महाराष्ट्र संवाद न्यूज
संगमनेर
‘हिंदूंच्या मुलींना घेऊन बसतो का’ या कारणावरून दहा ते पंधरा जणांनी दोघा तरुणांचे अपहरण करून त्यांना बेदम मारहाण केल्याची घटना शनिवारी दुपारी संगमनेर शहरात आणि शहरालगतच्या खांजापूर जवळील विठ्ठलकडा येथे घडली. या संदर्भात संगमनेर शहर पोलीस ठाण्यात अज्ञात दहा ते पंधरा जणांविरोधात गुन्हा दाखल करण्यात आला.
दरम्यान या प्रकरणाला लव्ह जिहादचा संशय निर्माण झाल्याने घटनेचे गांभीर्य लक्षात घेत पोलीस निरीक्षक भगवान मथुरे यांच्यासह पोलिसांनी सतर्कता दाखविल्याने परिस्थिती नियंत्रणात राहिली. शहर पोलीस ठाण्यात मध्यरात्री गुन्हा दाखल करण्यात आल्यानंतर पोलिसांनी आठ जणांना अटक केल्याची माहिती समोर येत आहे.
दोन तरुण एका तरुणीसोबत मालदाड रोडवरील डी.ई. लाईट कॅफे हाऊसमध्ये बसलेले असल्याचे माहिती समजल्यानंतर या दोन तरुणांचे शनिवारी दुपारी दहा ते पंधरा जणांनी अपहरण करून त्यांना खांजापूर जवळील विठ्ठल कडा येथे नेत बेल्ट, काठी आणि लोखंडी रॉडने त्यांना बेदम मारहाण करण्यात आली. त्यांच्याकडील मोबाईल काढून घेत पुन्हा हिंदू मुलींच्या नादी लागाल तर ठार मारू अशी धमकी देण्यात आल्याचे म्हटले आहे. बेदम मारहाण करण्यात आलेल्या दोन्ही तरुणांना रात्री रुग्णालयात उपचारासाठी दाखल करण्यात आले.
मफाज मतीन खान पठाण आणि सचिनकुमार महंतो अशी जखमी तरुणांची नावे आहेत. दोन्ही तरुणांना उपचारासाठी रुग्णालयात दाखल केल्यानंतर रुग्णालयाबाहेर मोठा जमाव जमला होता. तसेच शहरात काही काळ तणावाचे वातावरण निर्माण झाले. त्यामुळे पोलिसांनी सतर्कता दाखवत परिस्थितीवर नियंत्रण मिळविण्यात यश मिळविले. पोलिसांनी जखमींचे जबाब घेत मफाज मतीन खान पठाण याच्या फिर्यादीवरून दहा ते पंधरा जणांविरोधात अपहरण दरोडा आदी विविध कलमान्वये गुन्हा दाखल करण्यात आला आहे.
दरम्यान या प्रकरणी शहर पोलिसांनी करण संपत गलांडे (वय 21, रा. अभंग मळा, संगमनेर), सोहम शेखर नेवासकर (वय 22, रा. गणेशनगर, संगमनेर), ओंकार राजेंद्र जोर्वेकर (वय 19, रा. अकोलेनाका, संगमनेर), विश्वास सिताराम मोहरीकर (वय 19, रा. नेहरू चौक, संगमनेर), संकेत बाबासाहेब सोनवणे (वय 21, रा. कुंभारआळा, संगमनेर), अजित अंकुश भरते (वय 24, रा. कुंभारआळा, संगमनेर), निशांत नंदू अरगडे (वय 21, रा. अरगडे गल्ली, संगमनेर) आणि विक्रम खडकसिंग लोहार (वय 22, रा. घुलेवाडी, संगमनेर) या आठ जणांना अटक केल्याची माहिती समोर येत असून पोलीस अन्य आरोपींचा शोध घेत आहेत. पोलीस निरीक्षक भगवान मथुरे यांच्या मार्गदर्शनाखाली सहाय्यक पोलीस निरीक्षक पवार तपास करीत आहेत.
