महाराष्ट्र संवाद न्यूज
संगमनेर :
संगमनेर शहर व परिसरातून दररोज दुचाकीची चोरी सुरू होती. या दुचाकी चोरांचा छडा लावण्याचे आव्हान पोलिसांसमोर निर्माण झाले होते. पोलीस उपाधीक्षक आणि शहर पोलीस ठाण्याचे निरीक्षक यांच्या मार्गदर्शनाखाली नेमलेल्या चार पोलीस कर्मचाऱ्यांच्या पथकाने दुचाकी चोरी करणाऱ्या अल्पवयीन मुलासह दोघा आरोपींकडून तब्बल २६ लाख रुपये किमतीच्या चोरीच्या ५१ मोटर सायकल हस्तगत करत आरोपींना ताब्यात घेतले. प्रदीर्घ कालखंडानंतर संगमनेरात झालेल्या या मोठ्या शोध मोहिमेचे पोलीस अधीक्षक राकेश ओला यांनी बुधवारी संगमनेरमध्ये येऊन पथकाच्या कामगिरीचे कौतुक केले.
संगमनेर शहर पोलीस ठाणे, तालुका पोलीस ठाणे, घारगाव पोलीस ठाणे, आश्वी पोलीस ठाण्याच्या हद्दीतून दररोज दुचाकी चोरी सुरू होती. ओला म्हणाले, दुचाकी चोरी हा पोलिसांसमोरील गंभीर विषय बनला होता. उपाधीक्षक संजय सातव, शहर पोलीस निरीक्षक भगवान मथुरे यांनी दुचाकी चोरांच्या शोधासाठी पोलीस नाईक अण्णासाहेब दातीर, पोलीस कॉन्स्टेबल अमृत आढाव, सुभाष बोडखे व प्रमोद गाडेकर, पोलीस नाईक फुरखान शेख यांचे पथक नियुक्त केले होते.
या पथकाने पोलीस उपाधीक्षक संजय सातव, पोलीस निरीक्षक भगवान मथुरे यांच्या मार्गदर्शनाखाली शहर पोलीस ठाण्याच्या हद्दीतून चोरी गेलेल्या दुचाकींचा शोध सुरू केला. परिसरातील सीसीटीव्ही फुटेजची तपासणी केली असता होतं का नाही एका अल्पवयीन आरोपीला ताब्यात घेतले. त्याला विश्वासात घेत त्याच्याकडे चौकशी केली असता त्याने अक्षय सावन तामचीकर (वय १८ वर्ष) आणि सुरजित दिलीपसिंग तामचीकर (वय २२ वर्ष) दोघे रा. भाटनगर, घुलेवाडी, संगमनेर यांना ताब्यात घेतले असता त्यांनी संगमनेर परिसरातून दुचाकींची चोरी केल्याचे कबूल केले.
पोलीस पथकाने एक-एक करीत तब्बल ५१ दुचाकी हस्तगत केल्या आहेत. पोलीस चौकशी दरम्यान आरोपींनी संगमनेर शहर, शिर्डी, आश्वी, घारगाव, बोटा, राजुर, कोपरगाव, श्रीरामपूर, नेवासा, वावी, नांदूर शिंगोटे, नाशिक, देवळाली, एमआयडीसी व सिन्नर या पोलीस ठाण्याच्या हद्दीतून दुचाकींची चोरी केल्याचे कबूल केले आहे. आरोपींनी स्प्लेंडर मोटारसायकलींची मोठ्या प्रमाणात चोरी केल्याचे दिसून आले. तसेच चोरी केलेल्या दुचाकींची विक्री बाहेरच्या जिल्ह्यामध्ये तसेच सेंधवा (मध्यप्रदेश) येथे केल्याचे सांगितले. पोलीस पथकाने सिन्नर पोलीस ठाण्याच्या हद्दीतून २२, ओझर २, सायखेडा २, इगतपुरी ३, मंचर आणि चाकण ४, सातपूर नाशिक शहर १, संभाजीनगर कन्नड १, मालेगाव (वाशिम) २, सेंधवा मध्य प्रदेश येथून १ अशा विविध ठिकाणावरून ५१ दुचाकी विविध गुन्ह्यामध्ये जप्त करण्यात आल्या. यातील बहुतांशी दुचाकींचे मालक शोधण्यात पोलिसांना यश आले आहे. तसेच अल्पवयीन बालकाला त्याच्या नातेवाईकांच्या ताब्यात देण्यात आले आहे.
पोलीस अधीक्षक ओला यांच्या पत्रकार परिषदेवेळी उपविभागीय पोलीस अधिकारी संजय सातव, संगमनेर तालुका पोलीस ठाण्याचे निरीक्षक देविदास ढुमणे, शहर पोलीस ठाण्याचे निरीक्षक भगवान मथुरे, आदीसह पथकातील कर्मचारी उपस्थित होते.
