महाराष्ट्र संवाद न्यूज
अहमदनगर: मीटरमध्ये छेडछाड केल्याने तपासणीसाठी नेलेले मीटर पुन्हा जोडून देण्यासाठी वरिष्ठ उप अभियंता कोपनर यांच्याकरिता पन्नास हजार रुपये लाचेची मागणी करत तडजोडीअंती वीस हजार रुपये स्वीकारण्याची तयारी दाखविणाऱ्या महाराष्ट्र राज्य वीज वितरण कंपनीच्या सहाय्यक अभियंता विरोधात लाचलुचपत विभागाने गुन्हा दाखल केला आहे.
कमलेश युवराज पवार वय २९ वर्ष, मुळ रा. प्लॉट नं. १२०, सी २ भवनच्या पाठीमागे, खुटवडनगर, नाशिक हल्ली रा. शुभ रेसीडेंसी, नवले नगर, पारिजात चौक, सावेडी, अहमदनगर असे लाचखोर सहाय्यक अभियंत्याचे (वर्ग दोन) नाव आहे.
लाचखोर कमलेश युवराज पवार हा महाराष्ट्र राज्य वीज वितरण कंपनीच्या चिचोंडी पाटील येथील सब स्टेशनमध्ये कार्यरत असून तक्रारदाराचे अंभोरा, ता. आष्टी जि. बीड येथे आंबेश्वर कृषीवन पर्यटन हे रिसॉर्ट आहे. रिसॉर्टसाठी त्यांनी अहमदनगरच्या महावितरण कंपनीच्या चिचोंडी पाटील सब स्टेशनमधून वीज जोडणी घेतलेली आहे.
सदर विज जोडणीच्या मीटरमध्ये छेडछाड केल्याच्या कारणावरून मीटर तपासणीसाठी सहाय्यक अभियंता पाटील यांनी काढून नेले होते. सदरचे मीटर पुन्हा जोडून देण्यासाठी पाटील यांनी तक्रारदाराकडे वरिष्ठ उपअभियंता कोपनर यांच्याकरिता पन्नास हजार रुपये लाचेची मागणी २४ मार्चला केली होती.
त्यामुळे तक्रारदाराने अहमदनगरच्या लाचलुचपत विभागाशी संपर्क करत तक्रार केली होती. नाशिक लाच लुचपत विभागाच्या पोलीस अधीक्षक शर्मिष्ठा वालावलकर, अप्पर पोलीस अधीक्षक नारायण न्याहाळदे, वाचक पोलीस उपाधीक्षक नरेंद्र पवार, अहमदनगरचे पोलीस उपअधीक्षक हरीश खेडकर यांच्या मार्गदर्शनाखाली सापळा अधिकारी पोलीस निरीक्षक गहिनीनाथ गमे, सहाय्यक सापळा अधिकारी पोलीस निरीक्षक शरद गोर्डे, पोलीस अंमलदार वैभव पांढरे, बाबासाहेब कराड, राधा खेमनर, चालक पोलिस हवालदार दशरथ लाड यांच्या पथकाने तक्रारीचे खात्री केले असता सहाय्यक अभियंता आरोपी कमलेश पवार यांनी तडजोडी अंती वीस हजार रुपये स्वीकारण्याची तयारी दर्शविली म्हणून अहमदनगर तालुका पोलीस ठाण्यात आरोपी कमलेश पवार यांच्या विरोधात गुरुवारी रात्री उशिरा गुन्हा दाखल करण्यात आला असून आरोपी पवार याला ताब्यात घेतल्याची माहिती लाचलुचपत विभागाने दिली आहे.
——————————————
महाराष्ट्र संवाद न्यूजच्या वतीने सर्व नागरिकाना आवाहन करण्यात येते की, आपणास कोणी लोकसेवक शासकिय काम करुन देण्यासाठी लाचेची मागणी करीत असेल तर अँटी करप्शन ब्यूरो, अहमदनगर टोल फ्री क्रमांक १०६४ आणि दूरध्वनी क्रमांक ०२४१/ २४३२६७७ वर संपर्क करावा.
