मनोरुग्णास अन्न पाणी न देता दोरीने बांधून ठेवत त्याच्या आत्महत्येस कारणीभूत ठरणाऱ्या महिलेवर गुन्हा, संगमनेर तालुक्यातील धक्कादायक प्रकार

महाराष्ट्र संवाद न्यूज
संगमनेर:
मनोरुग्णाचा झटका आल्याने दिवस-रात्र अन्न पाणी न देता त्याला दोरीने बांधून ठेवत मनोरुग्णाच्या आत्महत्येस कारणीभूत ठरणाऱ्या महिलेवर संगमनेर तालुका पोलीस ठाण्यात गुन्हा दाखल करण्यात आला आहे.

संगमनेर तालुक्यातील हिवरगाव पावसा येथे हा प्रकार घडला असून सारंगधर गंगाधर पावसे (वय ६० वर्ष) असे मृत झालेल्या व्यक्तीचे नाव आहे. या संदर्भात त्यांच्या पत्नीने संगमनेर तालुका पोलीस ठाण्यात दिलेल्या तक्रारीवरून माधुरी प्रभाकर गोडसे (रा. लहीत लिंगदेव, ता. अकोले, हल्ली मु. आठरके वस्ती, हिवरगाव पावसा, ता. संगमनेर, जि. अहमदनगर) या महिलेविरोधात गुन्हा दाखल करण्यात आला आहे.

या संदर्भात माहिती अशी, फिर्यादी माहेरी गेल्यानंतर तिचा पती सारंगधर गंगाधर पावसे यांना २९ मार्चला सकाळी अकरा ते साडेअकरा वाजेच्या दरम्यान मनोरुग्णपणाचा झटका आला. त्यामुळे ते घरातील लोकांना त्रास देऊ लागल्याने आरोपी महिला माधुरी गोडसे हिने रस्त्याने येणाऱ्या जाणाऱ्या लोकांच्या मदतीने सारंगधर पावसे यांचे हातपाय दोरीने बांधून घरासमोरील पडवीत सिमेंटच्या पोलला त्यांना बांधून ठेवले होते.

३० मार्चला सकाळी साडेनऊ वाजण्याच्या सुमारास सारंगधर पावसे यांचे हालचाल मंदावल्याने त्यांचे हातपाय सोडण्यात आले. मात्र भुकेल्या झालेल्या पावसे यांना जेवण न दिल्याने त्यांनी घरातील मिळेल ते पिऊन घेतले. आरोपीने फिर्यादीच्या पतीस 29 मार्च ते 30 मार्च दरम्यान जेवण न देता हातपाय बांधून फिर्यादीच्या पतीचा छळ करीत पावसे यांना आत्महत्या करण्यास प्रवृत्त केल्याने त्यांनी काहीतरी विषारी औषध पिऊन आत्महत्या केली आहे अशा आशयाची फिर्याद दिल्याने तालुका पोलिसांनी सीआरपीसी १७४ च्या चौकशीवरून आरोपी विरोधात आत्महत्येस प्रवृत्त केल्याचा गुन्हा रविवारी पहाटे दाखल केला आहे.

घटनास्थळी पोलीस उपाधीक्षक संजय सातव, तालुका पोलीस ठाण्याचे निरीक्षक देविदास ढुमणे, पोलीस उपनिरीक्षक आय. ए. शेख आदींनी घटनास्थळी भेट दिली. पुढील तपास पोलीस उपनिरीक्षक आय. ए. शेख हे करीत आहेत.