महाराष्ट्र संवाद न्यूज
ऐतिहासिक शहागडाच्या पायथ्याशी असलेल्या पेमगिरी येथे सर्वात उंच मारुतीरायांच्या ३० फूट गदेचा लोकार्पण सोहळा हनुमान जन्मोत्सव दिनी गुरुवारी (६ एप्रिल) सायंकाळी पाच वाजता काँग्रेस विधिमंडळ पक्षनेते, आमदार बाळासाहेब थोरात, आमदार सत्यजित तांबे, माजी आमदार डॉ. सुधीर तांबे, आमदार डॉ. किरण लहामटे, अभिनेता देवदत्त नागे, प्रा. नामदेवराव जाधव यांच्या उपस्थितीत आयोजित करण्यात आला आहे.
पेमगिरी हे संगमनेर तालुक्यातील ऐतिहासिक गाव असुन शहागड व भारतातील सर्वात मोठा वटवृक्ष या गावात आहे. याचबरोबर आता नव्याने सर्वात उंच मारुतीरायांची ३० फूट गदा या ठिकाणी उभारली आहे. हनुमान जन्मोत्सव दिनी या ऐतिहासिक गदेचा लोकार्पण समारंभ मान्यवरांच्या उपस्थितीत आयोजित करण्यात आला आहे. याप्रसंगी डॉ. प्रसाद रसाळ, अजित पाटील, राजेंद्र जाधव व छत्रपती युवा प्रतिष्ठान कळस यांना गौरवण्यात येणार आहे.
या कार्यक्रमासाठी माजी नगराध्यक्ष दुर्गाताई तांबे, ॲड. माधवराव कानवडे, दूध संघाचे अध्यक्ष रणजितसिंह देशमुख, बाबा ओहोळ, कॅन्सरतज्ञ डॉ. जयश्री थोरात, इंद्रजीत थोरात, संपत डोंगरे, रामहरी कातोरे, राजेश मालपाणी, मिलिंद कानवडे, बाळासाहेब देशमाने, पांडुरंग घुले यांच्यासह संगमनेर तालुक्यातील विविध संस्थांचे पदाधिकारी उपस्थित राहणार आहेत.
कार्यक्रमासाठी संगमनेर तालुका व पंचक्रोशीतील नागरिक, युवक व महिलांनी मोठ्या संख्येने उपस्थित राहण्याचे आवाहन पेमगिरी ग्रामस्थांच्यावतीने करण्यात आले आहे.
