महाराष्ट्र संवाद न्यूज
रात्रंदिवस माणसांची वर्दळ असलेल्या बस स्थानकासमोरील काश्मीर हॉटेललगत अज्ञात चोरट्याने दोन किराणा दुकान फोडत दुकानातील रोकड रकमेसह सिगारेट, विलायची असा पावणेदोन लाखाचा मुद्देमाल लंपास केला आहे. सीसीटीव्हीच्या नियंत्रणाखाली असलेला परिसर आणि सातत्याने 24 तास माणसांची वर्दळ असलेल्या ठिकाणी झालेली ही चोरी शहरात चर्चेचा विषय ठरली आहे.
संगमनेर शहर पोलीस ठाण्यात या संदर्भात तुषार अशोक राठी यांनी दिलेल्या फिर्यादीवरून अज्ञात चोरट्यांविरोधात गुन्हा दाखल करण्यात आला आहे. शहरातून जाणाऱ्या नासिक-पुणे महामार्गावर बस स्थानक आणि हॉटेल काश्मीर या गजबजलेल्या परिसरात काश्मीर हॉटेल लगत राठी यांच्या मालकीची किराणा दुकाने आहेत. फिर्यादी तुषार राठी हे सोमवारी रात्री दहा वाजता दुकान बंद करून घरी गेले होते. मंगळवारी सकाळी सात वाजता दुकान उघडण्यास नेहमीप्रमाणे आले असता त्यांना, किराणा दुकानातील सिगारेटचा माल दिसला नाही तसेच गल्ल्यातील रोख रक्कमही दिसून आली नाही. त्यामुळे त्यांनी वडील अशोक राठी यांना दुकानातील सिगारेट आणि रोख रकमेबद्दल विचारणा केली असता त्यांनी याबाबत माहिती नसल्याचे सांगितले.
राठी या भावंडांचे हॉटेल काश्मीर शेजारी पत्र्याच्या शेडमध्ये पल्लवी किराणा आणि गणेश किराणा दुकान आहे. शेजारी शेजारी असलेल्या दुकानच्या शेडची एक खिडकी नेहमी उघडी असते. त्यामुळे ही खिडकी उचकटून अज्ञात चोरट्याने दोघांच्या दुकानातील सुमारे 92 हजार रुपयांची सिगारेट, 36 हजार रुपयांची विलायची आणि दुकानच्या गल्ल्यातील 42 हजार 500 रुपयांची रोकड असा सुमारे पावणेदोन लाख रुपयांचा मुद्देमाल लंपास केला.
सोमवारी रात्री दहा ते मंगळवारी सकाळी सात वाजे दरम्यान चोरीची ही घटना घडली असून या संदर्भात संगमनेर शहर पोलीस ठाण्यात चोरीचा गुन्हा दाखल करण्यात आला आहे. अत्यंत वर्दळीच्या आणि गजबजलेल्या ठिकाणी झालेल्या या चोरीचा तपास लावण्याचे आव्हान पोलिसांसमोर निर्माण झाले असून पोलीस निरीक्षक भगवान मथुरे यांच्या नेतृत्वाखाली पोलीस पुढील तपास करीत आहेत.
