महाराष्ट्र संवाद न्यूज
अनैतिक संबंधाचा जाब विचारण्याचा प्रयत्न करणाऱ्या महिला वकिलाला गळा दाबून, मारहाण करीत जीवे मारण्याचा प्रयत्न केल्याची घटना संगमनेर शहरालगतच्या घुलेवाडी गावामध्ये मंगळवारी अहिंसेचा संदेश देणाऱ्या महावीर जयंती दिनी घडली आहे. या प्रकरणी संगमनेर शहर पोलीस ठाण्यात तिघांविरोधात गुन्हा दाखल करण्यात आला आहे.
संबंधित वकील महिला जिल्ह्यातील एका न्यायालयात वकिली करत आहे. या महिलेच्या पतीचे बाहेर अनैतिक संबंध आहेत, ही बाब त्यांना माहीत झाल्यानंतर त्यांनी या संदर्भात पतीला समजावून सांगण्यासाठी आपल्या सासूला सांगितले होते. महावीर जयंतीदिनी 4 एप्रिल ला संबंधित महिला आपल्या घरी असताना सकाळी साडेदहा वाजण्याच्या सुमारास या महिलेच्या सासूने तिच्या पतीस आणि महिलेचा पती असलेल्या मुलास घरी बोलावून घेतले.
नवरा घरी येतात त्याने महिलेला शिवीगाळ करण्यास सुरुवात केली. घराचे दरवाजे बंद करत नवरा, सासरा आणि सासूने त्यानंतर महिलेला बेडरूममध्ये ओढून नेत मारहाण करण्यास सुरुवात केली. त्याचवेळी नवऱ्याने पत्नीला खाली पाडून तिच्या छातीवर बसत तिचा गळा दोन्ही हाताने दाबला. यावेळी महिलेचा श्वास गुदमरला गेला. याच दरम्यान सासू-सासरे देखील तिला मारहाण करत होते. मारहाण करताना ते नवऱ्याला माझा गळा दाबून मारून टाकण्यास सांगत होते. सासरा महिलेच्या पायाला धरून घरामध्ये जोरात इकडे-तिकडे ओढत होता.
गळा दाबून मारण्याचा प्रयत्न झाल्यानंतर ही महिला बेशुद्ध पडली. काही वेळानंतर शुद्धीवर आल्यावर या महिलेने गुपचूप कुणाला न सांगता घराबाहेर येत एका राजकीय पक्षाच्या सामाजिक कार्यकर्त्याला दुसऱ्याच्या मोबाईल फोनवरून फोन करत आपबीती कथन केली. कार्यकर्त्याने घरातील लोकांना विश्वासात घेत या महिलेला उपचारासाठी रुग्णालयात दाखल केले. मारहाणीमध्ये संबंधित वकील महिलेच्या चेहऱ्याला पोटाला छातीला मार लागला आहे.
रुग्णालयात उपचार घेत असताना दिलेल्या जबाबावरून पोलिसांनी महिलेचा पती सासू आणि सासऱ्या विरोधात गुन्हा दाखल केला असून पुढील तपास पोलीस निरीक्षक भगवान मथुरे यांच्या मार्गदर्शनाखाली पोलीस उपनिरीक्षक निवांत जाधव करीत आहेत.
