अहमदनगर – महाराष्ट्र संवाद न्यूज
दुबईहून आलेले तीन दहशतवादी मुंबईत घुसले आहे. त्यांचा संबंध पाकिस्तानशी आहे, अशी माहिती देत पोलिसांची दिशाभूल केल्याप्रकरणी अहमदनगरमधून एका व्यक्तीला अटक करण्यात आली आहे.
यासिन सय्यद (वय ४७) असे आरोपीचे नाव असून त्याला महाराष्ट्र एटीएसने अहमदनगर येथे कारवाई करत ताब्यात घेतले. व्यक्तिगत वैमनस्यातून आरोपीने मुंबई पोलिसांच्या कंट्रोल रूममध्ये ७ एप्रिलला फोन करुन खोटी माहिती दिल्याचे तपासात उघड झाले.
आरोपी सय्यद याने मुंबई पोलिसांच्या कंट्रोल रूमला फोन करून मुंबईत दहशतवादी घुसल्या संदर्भात माहिती दिली होती. दुबईहून आलेले तिघे दहशतवादी शुक्रवारी सकाळी मुंबईत घुसले असून त्यांचा संबंध पाकिस्तानशी आहे. यावेळी त्याने एका दहशतवाद्याचे नाव मुजीब सय्यद असे असल्याचे पोलिसांना सांगितले. तसेच त्याचा मोबाईल नंबर आणि गाडीचा नंबर पोलिसांना दिला होता.
या कॉलनंतर मुंबई पोलिसांनी तातडीने तपासाला सुरुवात केली होती. घटनेचे गांभीर्य लक्षात घेत महाराष्ट्र एटीएसने देखील या संदर्भात तपास केला आरोपीने बदला घेण्यासाठी मुंबई पोलिसांना फोन केल्याचे समोर आले.
आरोपीने २०१३ साली हे सिमकार्ड विकत
घेतले होते आणि ते कार्ड बंद होऊ नये म्हणून तो ते फक्त रिचार्ज करत होता. बदला घेण्यासाठी मुंबई पोलिसांना फोन करताना
त्याने या सिम कार्डचा वापर केला. यानंतर महाराष्ट्र एटीएसने आरोपीला अहमदनगर मधून अटक करुन त्याला पुढील कारवाईसाठी मुंबईच्या आझाद मैदान
पोलिसांच्या ताब्यात दिले आहे.
