महाराष्ट्र संवाद न्यूज
रमजान ईदच्या पूर्वसंध्येला मुस्लिम समाजातील दोन गटात झालेल्या दंगलीमुळे ईदच्या सणाला संगमनेरमध्ये गालबोट लागले आहे. शहर पोलिसांनी नगरसेवकासह निष्पन्न झालेल्या आठ जणांसह 28 जणांविरोधात दंगल, विनयभंग आणि शस्त्राचा वापर आदी कलमान्वये गुन्हा दाखल केला आहे. यातील एकास अटक केल्याची माहिती समोर येत आहे. दोन गटातील वादाची परिणती प्राणघातक हल्ल्यात झाली.
शहरातील नाईकवाडपुरा भागात शुक्रवारी संध्याकाळी ही घटना घडली. हाणामारीमध्ये तलवार, चाकू, हॉकी स्टिकचा वापर करण्यात आल्याने चार जण जखमी झाले. जखमींवर रुग्णालयात उपचार सुरू आहेत. या घटनेमुळे रात्री नाईकवाडपुरा भागात मोठा तणाव निर्माण झाला होता. पोलिसांनी वेळीच हस्तक्षेप परिस्थिती नियंत्रणात आणली असली तरी रमजान ईदच्या पवित्र सणाला मात्र या प्रकारामुळे गालबोट लागले आहे.
शहर पोलीस ठाण्यात पहाटे जखमीच्या नातेवाईकांनी दिलेल्या तक्रारीवरून गुन्हा दाखल करण्यात आला आहे. तक्रारीत म्हटले आहे की, संबंधित महिला शुक्रवारी सायंकाळी बाजारातून आपल्या घराकडे जात असताना आरोपी अहमद अब्दुल वाहिद शेख याने त्यांना रस्त्यात आडवत त्यांचा हात धरत लज्यास्पद वर्तन केले. त्यामुळे पीडित महिलेचा मुलगा मध्ये आला असता त्याला अहमद शेख याच्यासह नगरसेवक रिजवान शेख, जयेश अहमद शेख, रेहान शेख, नवाज शेख यांनी मारहाण केली. आरोपीपैकी एकाने हॉकी स्टिकने संबंधित महिलेच्या मुलावर हल्ला चढवला त्यामुळे मध्यस्थीसाठी मध्ये पडलेल्या हमजा मुसा सय्यद, कैफ परवेज शेख व अमन अखिल शेख यांना देखील जमावाने मारहाण केली. यादरम्यान हमजा सय्यद याच्यावर तलवारीने वार करण्यात आला मात्र ते बचावले.
दरम्यान 15 ते 20 जणांनी हमजा सय्यद याला बेदम मारहाण करत जीवे मारण्याची धमकी दिली. यावेळी पीडित महिलेच्या मुलासह मध्यस्थीसाठी मध्ये पडलेले अन्य तिघेजण हाणामारीत जखमी झाले असून त्यांच्यावर रुग्णालयात उपचार सुरू आहेत. पोलीस पुढील तपास करत आहेत.
