महाराष्ट्र संवाद न्यूज
वडदरा (बोटा) येथे शनिवारी (22 एप्रिल) रात्री उत्तम बाळाजी कुऱ्हाडे (वय 62 वर्ष) यांचा मृतदेह घरात रक्ताच्या थारोळ्यात आढळून आला होता. त्यामुळे घरात घुसलेल्या बिबट्याने त्यांच्यावर हल्ला केल्याने त्यांचा मृत्यू झाल्याचे म्हटले जात होते मात्र कुऱ्हाडे यांच्या शवाविच्छेदन अहवालानंतर त्यांचा मृत्यू बिबट्याच्या हल्ल्यात झाला नसल्याचे समोर आले आहे. त्यामुळे या मृत्यू प्रकरणाला वेगळ वळण मिळाला असून कुऱ्हाडे यांचा खून करण्यात आला असल्याच्या शक्यतेने पोलीस तपास करण्यात येत आहे.
नासिक-पुणे राष्ट्रीय महामार्गावरील घारगाव या महत्त्वाच्या गावालगत असलेल्या बोटा गावांतर्गत येणाऱ्या वडदरा येथे शनिवारी रात्री वृद्ध आई समवेत घरात असलेल्या उत्तम बाळाजी कुऱ्हाडे यांच्यावर घरात घुसलेल्या बिबट्याने हल्ला केला. त्यात त्यांचा मृत्यू झाला, अशी माहिती पुढे आली होती. मात्र घटनास्थळी आलेल्या वनविभागाच्या अधिकारी कर्मचाऱ्यांना बिबट्याने हल्ला केल्या संदर्भात संशयास्पद काहीही आढळून आले नाही. कुऱ्हाडे अविवाहित असून ते आपल्या वृद्ध आई समवेत घरात राहत होते. घरातील चुली जवळच त्यांचा मृतदेह रक्ताच्या थारोळ्यात पडलेला होता.
वृद्ध आईने केलेला आरडाओरडीमुळे आजूबाजूच्या नागरिकांनी घटनास्थळी धाव घेत याची माहिती वनविभाग आणि घारगाव पोलिसांना दिली होती. घटनास्थळी आलेल्या वनविभाग आणि घारगाव पोलिसांनी मृतदेह वैद्यकीय तपासणीसाठी संगमनेरच्या कुटीर रुग्णालयात पाठविला होता. वैद्यकीय तपासणीअंती कुऱ्हाडे यांचा मृत्यू त्यांच्या पाठीवर धारदार हत्याराने करण्यात आलेल्या जखमेमुळे हृदय आणि फुफ्फुसाला मार लागल्याने झाला असल्याचा निष्कर्ष समोर आल्याने हा घातपाताचा प्रकार असल्याचा संशय बळावला आहे.
त्यामुळे रविवारी सकाळीच घटनास्थळी नगर येथून श्वान पथक ठसे तज्ञांना पाचारण करण्यात आले होते. कुऱ्हाडे यांचा खून करण्यात आल्याची शक्यता लक्षात घेत घारगाव पोलिसांनी तपासाला सुरुवात केली आहे कुऱ्हाडे यांचा परिसरात कोणाशी वाद होता का? कोणी आणि कोणत्या कारणामुळे त्यांची हत्या केली या बाबी पोलीस तपासामध्ये समोर येणार आहेत. दरम्यान कुऱ्हाडे यांचा शवाविच्छेदन अहवाल पोलिसांना प्राप्त झाल्यानंतर याप्रकरणी तपासला दिशा मिळेल तसेच त्यानंतर अज्ञात व्यक्ती विरोधात खुनाचा गुन्हा दाखल केला जाणार असल्याची माहिती घारगाव पोलीस ठाण्याचे पोलीस निरीक्षक संतोष खेडकर यांनी दिली.
