संगमनेर (महाराष्ट्र संवाद न्यूज)
नवे वाळू धरण अस्तित्वात येण्याच्या पूर्वसंध्येला संगमनेरच्या महसूल विभागाने खांडगावमध्ये केलेल्या कारवाईत जेसीबी आणि वाळू साठा ताब्यात घेतल्याच्या घटनेला काही तास उलटत नाही तोच, महसूलने पुन्हा एकदा केलेल्या कारवाईत जेसीबीसह ट्रॅक्टर पकडण्यात यश आले आहे. विशेष म्हणजे या घटनांमधून गौण खनिज तस्करांशी संबंधितांची नावे देखील पुढे येऊ लागली आहेत.
दोन दिवसांपूर्वी खांडगावमध्ये झालेल्या कारवाईमध्ये चेतन साकोरे तर काल रात्री केलेल्या कारवाईत राहुल घुले याचे नाव समोर आले आहे. राज्याचे महसूल मंत्री राधाकृष्ण विखे पाटील यांनी अवैध वाळू तस्करी, गौण खनिज लूट थांबविण्यासाठी राज्यभरात नवे वाळू धोरण आणले आहे. महाराष्ट्र दिनापासून या नव्या धोरणाची राज्यात विशेष अहमदनगरमध्ये सुरुवात देखील झाली आहे. महसूल मंत्र्यांचे विशेष लक्ष असलेल्या संगमनेरमध्ये मात्र या नव्या धोरणाला हरताळ फासला जात असल्याचे महसूलच्या कारवाईतून समोर येत आहे. तुम्ही कितीही कायदे करा आम्ही तोडणारच, वाळूतस्करांना महसूलमंत्र्यांना हेच तर सुचवायचे नाही ना, असा देखील प्रश्न उपस्थित होत आहे. तीन दिवसातील दोन कारवाईंमधून संगमनेरातील वाळू तस्करी चांगलीच चव्हाट्यावर आली आहे.
संगमनेर तालुक्यातील कौठे धांदरफळ येथे जेसीबीच्या सहाय्याने मोठ्या प्रमाणात अवैधरित्या गौण खनिजाचे उत्खनन सुरू असल्याची माहिती महसूल प्रशासनाला मिळाली होती. त्यामुळे मंगळवारी रात्री नायक तहसीलदार उमाकांत कडनोर यांनी मंडलाधिकारी आणि तलाठ्यांना सोबत घेत घटनास्थळ गाठले. तेथे मोठ्या प्रमाणात गौण खनिजाचे मुरूम उत्खनन होत असल्याचे पथकाला दिसून आले.
पथकाने घटनास्थळी कारवाई सुरू करत तेथे गौण खनिज उत्खननासाठी वापरला जाणारा जेसीबी आणि एक ट्रॅक्टर ताब्यात घेतला. कारवाईदरम्यान येथून चार ट्रॅक्टर गायब करण्यात आल्याची देखील चर्चा सुरू आहे. महसूलच्या पथकाच्या कारवाईत जवळपास 25 लाखाचा मुद्देमाल हस्तगत केल्याचे सांगितले जाते.
कारवाईतील जेसीबी आणि ट्रॅक्टर जप्त करून पोलीस ठाण्याच्या वसाहतीत लावण्यात आला आहे. दरम्यान या प्रकरणी महसूल खाते संबंधितांवर केवळ दंडात्मक कारवाई करणार की पोलीस ठाण्यात गुन्हे दाखल करण्यात हे लवकरच पुढे येईल.
