पुणे (महाराष्ट्र संवाद न्यूज)
महिलेसोबत अश्लील संभाषण करून तिचा विनयभंग केल्याच्या आरोपावरून भारतीय पोलीस सेवेतील (आयपीएस) अधिकारी असलेल्या निलेश अष्टेकर यांच्या विरोधात पुण्याच्या भारती विद्यापीठ पोलीस ठाण्यात विनयभंगाचा गुन्हा दाखल करण्यात आला आहे. यामुळे पोलीस दलात खळबळ उडाली आहे.
अष्टेकर काही वर्षांपूर्वी पुणे शहर पोलीस दलामध्ये नेमणुकीस होते. सध्या ते गुप्त वार्ता विभागात कार्यरत आहेत. पोलीस दलातील वड्या आयपीएस अधिकाऱ्याविरुद्ध गुन्हा दाखल झाल्याने पोलीस दलात खळबळ उडाली आहे.
मूळची धुळ्याची असलेली ही 31 वर्षीय महिला सध्या ठाण्यामध्ये कळवा येथे राहावयास आहे. विधवा असल्याने धुण्याभांड्याची कामे करून ती आपला उदरनिर्वाह करते. अष्टेकर यांनी या महिलेच्या फेसबुक अकाउंटवर 19 फेब्रुवारी 2023 रोजी सायंकाळी पावणे सात वाजण्याच्या सुमारास फेसबुक मेसेंजरवर मेसेज केला होता. महिलेने त्यांना रिप्लाय केल्यानंतर त्यांच्यात संभाषण सुरू झाले. या संभाषणा दरम्यान त्यांची ओळख झाली होती.
अष्टेकर यांनी महिलेच्या मोबाईलवर संपर्क करत तिच्याशी अश्लील भाषेत संवाद साधला. त्यानंतर व्हिडिओ कॉल करून तिच्याशी असभ्य वर्तन केले. तसेच मुली संदर्भातही अश्लील भाषा वापरले असल्याचे या महिलेने आपल्या तक्रारीत म्हटले आहे.
अष्टेकर यांच्या विरोधात भारती विद्यापीठ पोलीस ठाण्यात गुन्हा रजिस्टर नंबर 271/2023 अन्वये भारतीय दंडविधान 354-A (2), 354-D, 509, 67 आणि 67-A प्रमाणे गुन्हा दाखल करण्यात आला आहे.
