संगमनेर (महाराष्ट्र संवाद न्यूज)
राष्ट्रीय स्वयंसेवक संघाचे द्वितीय सर संघचालक गोळवळकर गुरुजी यांच्याबाबत आक्षेपार्ह आणि बदनामीकारक मजकूर सोशल मीडियावर प्रसिद्ध केल्याप्रकरणी बीड जिल्ह्यातील माजलगाव येथील काँग्रेसच्या हरिभाऊ सोळंके यांच्यावर संगमनेर शहर पोलीस ठाण्यात गुन्हा दाखल करण्यात आला आहे.
एकलव्य संघटनेचे प्रदेशाध्यक्ष योगेश मनोहर सूर्यवंशी यांच्या तक्रारीवरून शहर पोलिसांनी सोळंके यांच्या विरोधात भारतीय दंड संहितेच्या कलम ५०० व ५०१ अन्वये हा गुन्हा दाखल केला आहे.
या संदर्भात पोलिसांकडे दिलेल्या तक्रारीत सूर्यवंशी यांनी म्हटले आहे की, ६ मे २०२३ रोजी सकाळी दहा वाजण्याच्या सुमारास त्यांच्या मोबाईल वरील संस्कृती संवर्धन नावाच्या व्हाट्सअप ग्रुपवर एक लिंक आली. सूर्यवंशी यांनी आलेली लिंक क्लिक करून ओपन केली असता सोळंकी यांनी त्यांच्या फेसबुकवर द्वितीय सरसंघचालक गोळवळकर गुरुजी यांच्याबाबत आक्षेपार्ह आणि बदनामीकारक मजकूर टाकलेला असल्याचे आढळून आले.
सोळंके यांच्या फेसबुकवरील आक्षेपार्ह आणि बदनामीकारक मजकूर असलेल्या लिखाणामुळे समाजामध्ये तेढ निर्माण होऊन वातावरण गढूळ होण्याची शक्यता असल्याचे आपल्या तक्रारीत म्हटले आहे. या तक्रारीवरून सोळंके यांच्या विरोधात गुन्हा दाखल करण्यात आला असून पुढील तपास पीएसआय पवार करत आहे.
○
यापुढे राष्ट्रीय स्वयंसेवक संघ, बजरंग दल या हिंदुत्ववादी संघटनांविषयी खोटी माहिती प्रसारित करणे, वादग्रस्त वक्तव्य करणाऱ्यांना एकलव्य स्टाईलने चोप देण्यात येईल, असा इशारा एकलव्य संघटनेचे प्रदेशाध्यक्ष योगेश मनोहर सूर्यवंशी यांनी दिला आहे.
