संगमनेर (महाराष्ट्र संवाद न्यूज)
कल्चरल फाउंडेशन ऑफ इंडियाद्वारे गुणी विद्यार्थ्यांना देण्यात येणारा यंदाचा नृत्य कलाभूषण पुरस्कार ध्रुव ग्लोबल स्कूलच्या तीन विद्यार्थीनींनी पटकावला. सौम्या सचिन जोशी, अदिती राजेश लाहोटी व श्रिया अमोल मुळे या विद्यार्थीनींचा यात समावेश आहे.
नागपूरच्या रेशीमबाग येथील सुरेश भट सभागृहात झालेल्या शानदार सोहळ्यात प्रसिद्ध मराठी अभिनेत्री प्रिया बेर्डे यांच्या हस्ते या पुरस्काराचे वितरण करण्यात आले. या पुरस्कारासाठी देशभरातील दीडशे स्पर्धकांमधून 27 विद्यार्थ्यांची निवड झाली, त्यात ध्रुव ग्लोबलच्या तिघींचा समावेश आहे. नटराज आर्ट अँड कल्चरलचे प्रा. रवींद्र हरदास, आसमान फाउंडेशनचे संस्थापक डॉ. रवी गिरे, भरतनाट्यम गुरू माडखोलकर, प्रा. डिंपल साखरे, प्रा. सुंदरी पिसिपती, अनिल कावडे, ममता जयस्वाल, प्रा. एकता कठोरे, नीलिमा बावणे व निशा श्रीवास्तव आदी यावेळी उपस्थित होते.
भारतातील वेगवेगळ्या नृत्यशैली प्रकारांचा अभ्यास करणार्या सुमारे दीडशेहून अधिक स्पर्धकांची या पारितोषिकासाठी निवड झाली होती. त्यातील 27 जणांची अंतिम निवड करण्यात आली व त्यांना ‘नृत्य कलाभूषण’ हा पुरस्कार देवून सन्मानित करण्यात आले. त्यामध्ये ध्रुव ग्लोबलच्या सौम्या सचिन जोशी, अदिती राजेश लाहोटी व श्रिया अमोल मुळे या विद्यार्थीनींचा समावेश होता.
ध्रुव ग्लोबल स्कूलमध्ये शालेय अभ्यासा बरोबर अभिजात कलांविषयी रुची निर्माण करण्यावर आणि कलांचे प्रशिक्षण देण्यावर विशेष भर दिला जातो. यासाठी ओडिसी नृत्याचे प्रशिक्षण देणारे दोन पूर्णवेळ प्रशिक्षक शाळेत उपलब्ध आहेत. ओडिसी नृत्याचे प्रशिक्षण घेणार्या या विद्यार्थिनींनी यापूर्वीही अनेक राष्ट्रीय व आंतरराष्ट्रीय स्पर्धांमध्ये विविध पारितोषिके पटकावली आहेत. या यशाबद्दल शाळेचे चेअरमन डॉ. संजय मालपाणी, व्हा. चेअरमन गिरीश मालपाणी, प्राचार्या अर्चना घोरपडे यांनी त्यांचे अभिनंदन केले.
