संगमनेर (महाराष्ट्र संवाद न्यूज)
राज्याचे महसूल मंत्री राधाकृष्ण विखे पाटील यांनी प्रतिष्ठेच्या केलेल्या संगमनेर कृषी उत्पन्न बाजार समितीच्या निवडणुकीत जनसेवा मंडळाचा सपशेल पराभव करत सत्ता कायम राखलेल्या आमदार बाळासाहेब थोरात यांच्या अधिपत्याखालील बाजार समितीचे सभापती, उपसभापती शुक्रवारी (ता.12 मे) निवडले जाणार आहेत. प्रतिष्ठेच्या असलेल्या या दोन्ही पदांवर कोणाची वर्णी लागते याकडे लक्ष लागले आहे.
बाजार समितीचे सभापती, उपसभापती निवडण्यासाठी नूतन संचालकांचे शुक्रवारी सकाळी साडेदहा वाजता बैठक बोलाविण्यात आली आहे. या बैठकीत आमदार थोरात यांनी निश्चित केलेल्या नावांना सहमती दर्शविली जाईल. सभापतीपदावर थोरात माजी सभापती शंकर खेमनर यांना पुन्हा संधी देतात की या पदासाठी दुसरे नाव समोर येते हे शुक्रवारीच कळणार आहे. आगामी विधानसभेचे गणित लक्षात घेता थोरात दोन्ही नावे विचारपूर्वक निवडून समतोल साधण्याची चिन्हे आहेत.
बाजार समितीच्या इतिहासात बिनविरोध निवडीची असलेली परंपरा यावेळी राज्याचे महसूल मंत्री राधाकृष्ण विखे पाटील यांच्या मार्गदर्शनाखालील जनसेवा मंडळाने मोडीत काढली. थोरात यांच्या उमेदवारांविरोधात भारतीय जनता पक्षासह अन्य पक्षातील तगडे उमेदवार देऊन थोरात यांच्यासमोर आव्हान निर्माण करण्याचा प्रयत्न करण्यात आला होता. मात्र निवडणुकीमध्ये विखे गटाच्या सर्वच उमेदवारांचा मोठ्या मताधिक्याने पराभव झाला. एका मतदार संघात तर विखेंच्या उमेदवाराला अवघ एक मत मिळालं होतं. या निवडणुकीत थोरात यांनी आपलं असलेलं एकहाती वर्चस्व पुन्हा एकदा सिद्ध केलं.
एकमेव अपक्ष म्हणून निवडून आलेले एकमेव उमेदवार देखील थोरात यांच्या शेतकरी विकास मंडळात सहभागी झाल्याने उद्या होणारी सभापती, उपसभापतीची निवडणूक बिनविरोध पार पडेल.
