राजुर (महाराष्ट्र संवाद न्यूज)
चोरट्यांनी चोरी करताना केलेल्या मारहाणीत अकोले तालुक्यातील वाकी येथे मधुकर किसन सगभोर यांचा खून झाल्याची घटना दोन दिवसांपूर्वी घडली होती. दोन दिवसांच्या पोलीस तपासानंतर हे प्रकरण वेगळाच वळणावर येऊन थांबले. सातत्याने होणाऱ्या वादाला कंटाळून पत्नीने पतीचा खून केल्याचे तपासात निष्पन्न झाले आहे. त्यामुळे या प्रकरणामागील बनाव देखील उघडा पाडण्यात पोलीस यशस्वी ठरले.
मधुकर सगभोर हे सातत्याने दारू पिऊन पत्नी, मुलांना मारहाण करणे, मद्यप्राशन करून घरामध्ये राडा करणे अशा प्रकारचे कृत्य करत असल्याने कारणाने वैतागलेल्या पत्नीच्या हातून पतीचा खून झाल्याचे समोर आले. घटनेच्या दिवशी देखील मुलाने त्यांना मद्यप्राशन करण्यासाठी पैसे दिले नाही म्हणून त्यांनी मुलाला मारहाण देखील केली होती. रात्री मधुकर सगभोर हे मद्यप्राशन करून घरी आले होते.
घरी आल्यावर त्यांनी वाद घालण्यास सुरुवात करत पत्नीला मारहाण केली होती. त्यामुळे झालेल्या वादामध्ये तो भिंतीवर जाऊन आदळल्याने त्याच्या डोक्याला मार लागला. तरीदेखील तो पत्नी पुष्पा हिला मारू लागल्याने तिने हातातील बटाटे शिलण्याचे यंत्र मधुकर सगभोर यांना फेकून मारले होते. त्यामुळे त्यांना मोठी जखम देखील झाली.
त्या रात्री मधुकर सगभोर हे न जेवता झोपी गेले होते. रक्तस्त्रावामुळे त्यांचा झोपेतच मृत्यू झाला असल्याचे त्यांच्या पत्नीच्या लक्षात आले. त्यामुळे सकाळी उठल्यावर लोकांना काय सांगायचे असा प्रश्न पडलेल्या पत्नीने चोरट्यांनी चोरी करताना केलेल्या मारहाणीमध्ये मृत्यू झाल्याचा बनाव केला होता. या प्रकारामुळे अकोले तालुक्यात खळबळ उडाली होती. दरम्यान राजुर पोलीस ठाण्याचे सहाय्यक पोलीस निरीक्षक गणेश इंगळे यांच्या नेतृत्वाखाली पोलीस पथकाने मयत मधुकर सगभोर याची पत्नी पुष्पा मधुकर सगभोर हिला विश्वासात घेत चौकशी केली असता चोरट्यांच्या मारहाणीत झालेल्या मृत्यूचा बनाव समोर आला.
पोलिसांनी पुष्पा मधुकर सगभोर हिला ताब्यात घेतले आहे. अवघ्या काही तासातच राजुर पोलिसांना खुनाच्या गुन्ह्याची उकल करण्यात यश आले.
