अहमदनगर (महाराष्ट्र संवाद न्यूज)
पोलीस ठाण्यात दाखल असलेल्या गुन्ह्यामध्ये आरोपींना अटक न करता त्यांना अटकपूर्व जामीन मंजूर व्हावा यासाठी मदत करण्याच्या मोबदल्यात तीस हजार रुपयांची मागणी करत तडजोडीअंती पंचवीस हजार रुपये स्वीकारण्याचे मान्य करणाऱ्या अहमदनगरच्या कोतवाली पोलीस स्टेशनच्या सहाय्यक पोलीस निरीक्षकाविरुद्ध गुन्हा दाखल करण्यात आला आहे.
या प्रकारामुळे अहमदनगर जिल्हा पोलीस दलात खळबळ उडाली आहे. विवेक अशोक पवार (वय ३५ वर्ष) असे या लाच मागणाऱ्या सहाय्यक पोलीस निरीक्षकाचे नाव आहे. कोतवाली पोलीस ठाण्यात त्यांची नियुक्ती आहे.
पवार यांनी तक्रारदाराचा मावस भाऊ आणि त्याच्याबरोबर असलेले चार सहआरोपी यांच्यावर अहमदनगरच्या कोतवाली पोलीस ठाण्यात दाखल असलेल्या गुन्ह्यात त्यांना अटक न करता अटकपूर्व जामीन मंजूर होणे कामी मदत करण्याच्या मोबदल्यात तीस हजार रुपयांच्या लाचेची मागणी केली होती. तडजोडीअंती पंचवीस हजार रुपये स्वीकारण्याचे मान्य केले.
त्यामुळे तक्रारदाराने नाशिकच्या एसीबीशी संपर्क साधत सहाय्यक पोलीस निरीक्षक पवार यांच्या विरोधात तक्रार दिली होती. लाचलुचपत प्रतिबंधक विभागाचे पोलीस निरीक्षक संदीप घुगे यांच्या मार्गदर्शनाखाली पोलीस हवालदार एकनाथ बाविस्कर, प्रकाश महाजन व नितीन नेटारे यांच्या पथकाने सापळा रुचून सहाय्यक पोलीस निरीक्षक विवेक पवार त्याच्या विरोधात कारवाई करून गुन्हा दाखल केला आहे.
एसीबीच्या पोलीस अधीक्षक श्रीमती शर्मिष्ठा घारगे-वालावलकर, अप्पर पोलीस अधीक्षक नारायण न्याहाळदे, वाचक पोलीस उपाधीक्षक नरेंद्र पवार यांच्या मार्गदर्शनाखाली ही कारवाई करण्यात आली.
