सातारा (महाराष्ट्र संवाद न्यूज)
जिल्हा न्यायालयात दाखल असलेल्या प्रोबेट अर्जाचा निकाल तक्रारदाराच्या बाजूने लावून देण्यासाठी दोन लाखाची मागणी करणारा आणि त्यासाठी एक लाख रुपये लाच स्वीकारणारा खाजगी वकील एसीबीने रंगेहात ताब्यात घेतला आहे. विलास बाळकृष्ण कुलकर्णी असे या वकिलाचे नाव आहे.
या घटनेतील तक्रारदार हे एका शिक्षण संस्थेचे अध्यक्ष असून सातारा दिवाणी न्यायालयात शिक्षण संस्थेच्या वतीने प्रोबेट अर्ज दाखल आहे. लोकसेवकावर प्रभाव पाडून या अर्जाचा निकाल तक्रारदाराच्या बाजूने लावून घेण्यासाठी वकील कुलकर्णी यांनी तक्रारदाराला दोन लाख रुपये द्यावे लागतील असे सांगत पैशाची मागणी केली होती.
त्यामुळे तक्रारदाराने सातारा विभागाच्या पोलीस उपाधीक्षक उज्वल वैद्य यांच्याशी संपर्क साधत तक्रार दाखल केली होती. वैद्य यांनी लाचखोर वकिलाला पकडण्यासाठी सापळा लावला. वकील वैद्य याला दोन लाख रुपयांपैकी एक लाख रुपये घेताना पथकाने रंगेहात ताब्यात घेतले आहे. आरोपी विरोधात सातारा पोलीस ठाण्यात भ्रष्टाचार प्रतिबंधक अधिनियम १९९८ चे कलम ७ (अ) अन्वये गुन्हा दाखल करण्याचे काम सुरू होते.
पुणे परिक्षेत्राचे एसीबीचे अधीक्षक अमोल तांबे, अप्पर पोलीस अधीक्षक सुरज गुरव यांच्या मार्गदर्शनाखाली एसीबीच्या पोलीस उप अधीक्षक श्रीमती उज्वल वैद्य यांच्या नेतृत्वाखालील निलेश येवले, तुषार भोसले, शितल सपकाळ यांच्या पथकाने ही कामगिरी केली. वकिलालाच एसीबीने तब्बल एक लाख रुपयाची लाच स्वीकारताना पकडल्याने जिल्हा न्यायालयासह वकिलांमध्ये खळबळ उडाली आहे.
