नाशिक (महाराष्ट्र संवाद न्यूज)
साताऱ्या पाठोपाठ नाशिकमध्येही एसीबीने मोठी कामगिरी केली असून तब्बल तीस लाख रुपयांची लाच घेताना एका वकिलासह सहकार विभागाचा बडा मासा एसीबीच्या जाळ्यात अलगद अडकला आहे. यामुळे राज्याच्या सहकार विभागात खळबळ उडाली आहे. कृषी उत्पन्न बाजार समितीच्या संचालकपदाचा निर्णय बाजूने लावून देण्याच्या बदल्यात तीस लाखाच्या लाचेची मागणी करण्यात आली होती.
नाशिक जिल्ह्यातील दिंडोरी येथील कृषी उत्पन्न बाजार समितीच्या संचालकपदी तक्रारदार निवडून आले आहे. त्यांच्या निवडी विरोधात दाखल करण्यात आलेल्या प्रकरणात सुनावणी घेऊन या सुनावणीचा निर्णय तक्रारदाराच्या बाजूने देण्यासाठी जिल्हा उपनिबंधक सतीश भाऊराव खरे (वय ५७ वर्ष, रा. फ्लॅट नंबर २०१, आई हाईटस्, कॉलेज रोड, नाशिक व खाजगी इसम वकील शैलेश सुमतीलाल सभद्रा (वय ३२ वर्ष, रा. गंगापूर रोड नाशिक) यांनी तक्रारदाराकडे तीस लाख रुपयांची मागणी केली होती.
तक्रारदार संचालकाने या विरोधात नाशिक एसीबीसी संपर्क करत माहिती दिली. नासिक एसीबीने पोलीस अधीक्षक शर्मिष्ठा घारगे वालावलकर अप्पर अधीक्षक नारायण न्याहाळदे वाचक पोलीस उपअधीक्षक नरेंद्र पवार यांच्या मार्गदर्शनाखाली सोमवारी संध्याकाळी लाचखोरांना पकडण्यासाठी एसीबीचे पोलीस उपअधिक्षक अभिषेक पाटील, सहाय्यक पोलीस उपनिरीक्षक सुखदेव मुरकुटे, मनोज पाटील, अजय गरुड यांच्या पथकाने सापळा रचला होता.
सोमवारी संध्याकाळी तक्रारदाराकडून तीस लाख रुपयांची लाच घेताना नाशिक जिल्हा उपनिबंधक सतीश खरे यांना त्यांच्या राहत्या घरी वकील शैलेश सभद्रा याला रंगेहात पकडले. सोमवारी संध्याकाळी झालेल्या या कारवाईमुळे राज्याच्या सहकार क्षेत्रात मोठी खळबळ उडाली आहे. लाचखोरीची तब्बल तीस लाख रुपयांची भूक असलेला जिल्हा निबंधक खरे हा बडा मासा एसीबीच्या जाळ्यात अडकला असल्याने या अधिकाऱ्यांवरील कारवाईमुळे सहकार विभागाचे इभ्रत चव्हाट्यावर आली आहे.
