संगमनेर (महाराष्ट्र संवाद न्यूज)
संगमनेर बस स्टॅन्डजवळील अकोले रोड चौफूलीवर होत असलेली वाहतूक कोंडी आणि पोलिस नियंत्रण चौकी बसवण्याबाबत महाराष्ट्र नवनिर्माण सेनेच्यावतीने नगरपरिषदेच्या मुख्याधिकाऱ्यांना निवेदन देण्यात आले. मागणी तातडीने पूर्ण केल्यास रास्ता रोको आंदोलन करण्याचा इशाराही देण्यात आला आहे.
संगमनेर बस स्टॅन्ड जवळील अकोले रोड चौफूलीवर सतत वाहतूक कोंडी होत आहे. याचे मुख्य कारण ट्रैफिक सिग्नल असून नसल्यासारखे आहेत. वाहतूक नियंत्रण पोलिस चौकी नाही. सदर ठिकाणी असलेला अनधिकृत रिक्षा स्टॉप, आसपास झालेली व्यावसायिक अतिक्रमणे वाहतूक कोंडीसाठी कारणीभूत ठरत आहे.
मुख्याधिकाऱ्यांना दिलेल्या निवेदनामध्ये मनसेकडून विनंती करण्यात आली की, सदर ठिकाणी तात्काळ पोलिस नियंत्रण चौकी बसवण्यात यावी व रोडवरील घुलेवाडीलाईन अनधिकृत रिक्षा स्टॉप हटवण्यात यावा. सिग्नल दुरुस्त करून चालू करण्याची कृपा करावी, अशा स्वरुपाचे निवेदन देण्यात आले. याप्रसंगी जिल्हा उपाध्यक्ष दीपक वर्पे, शहराध्यक्ष तुषार ठाकुर, उपशहराध्यक्ष आकाश भोसले, बजरंग घुले, संजय शिंदे, अभिजीत घाडगे उपस्थित होते.
मनसेच्यावतीने करण्यात आलेल्या मागण्यांची दखल घेतली न गेल्यास रास्ता रोको आंदोलन करण्यात येईल, असा इशारा शहराध्यक्ष तुषार ठाकुर यांनी दिला आहे.
