संगमनेर (महाराष्ट्र संवाद न्यूज)
संगमनेरमध्ये शासनाने प्रतिबंधित केलेल्या गुटखा पान मसाला आणि सुगंधित तंबाखूची सर्रासपणे विक्री होत आहे. अन्न औषध प्रशासन विभागाच्या अधिकाऱ्यांनी डोळ्यावर झापड बांधल्याने शहर पोलिसांनी गुटखा विक्रेत्यांवर कारवाई सुरू केली आहे. दोघा विक्रेत्यांवर केलेल्या कारवाईत पोलिसांनी दोन दुचाकींसह सुमारे 57 हजाराचा मुद्देमाल जप्त केला आहे. याशिवाय येथील प्रमुख गुटखा विक्रेत्याला नगरच्या एलसीबीने ताब्यात घेतल्याची चर्चा आहे.
शहर पोलिसांनी रफिक पीरमोहम्मद शेख (वय 65 वर्ष, रा. अँग्लो उर्दू हायस्कूलसमोर, नाईकवाडपुरा, संगमनेर) आणि दिलीप सयाजी शिंदे (वय 34 वर्षे, युनिकॉर्न सोसायटी, गुंजाळवाडी, संगमनेर) या दोघा विक्रेत्यांवर कारवाई केली आहे. कारवाई पोलिसांनी त्यांच्याकडून दोन दुचाकी हस्तगत केल्या असून साधारणत: आठ हजाराचा गुटखा जप्त केला आहे.
पोलीस निरीक्षक भगवान मथुरे यांना रफिक पीरमोहम्मद शेख हा आपल्या दुचाकीवरून गुटखा घेऊन समनापुरच्या दिशेने जात आहे अशी माहिती मिळाली होती. त्यांनी तातडीने सहाय्यक पोलीस निरीक्षक राजेंद्र पवार यांच्या गस्तीवरील पथकाला माहिती देत कारवाई करण्याचे आदेश दिले. पथकाने समनापुर गणपतीजवळ सापळा लावला असता संशयित रफिक शेख हा आपल्या दुचाकीवरून समनापुरच्या दिशेने जात असताना त्याला पथकाने थांबविले. त्याच्याकडील पिशव्यांची झडती घेतली असता त्यात शासनाने प्रतिबंधित केलेला गुटखा पान मसाला आणि सुगंधित तंबाखू आढळून आली.
पोलीस कॉन्स्टेबल रामकिसन मुकरे यांच्या फिर्यादीवरून रफिक शेख याच्या विरोधात गुन्हा दाखल करण्यात आला आहे.
दुसऱ्या कारवाईत पोलिसांनी देवाचा मळा भागात केली. या कारवाईमध्ये दिलीप सहादू शिंदे हा शासनाने प्रतिबंधित केलेला गुटखा पान मसाला व सुगंधी तंबाखू आपल्या कब्जात बाळगताना आढळून आला. त्याच्याकडील दुचाकीसह पोलिसांनी 25 हजार चारशे रुपयांचा मुद्देमाल हस्तगत केला. पोलिसांनी या संदर्भात दोन्ही आरोपींविरोधात वेगवेगळ्या तक्रारीवरून भारतीय दंड विधान संहिता कलम 188, 272, 273, 328 अन्नसुरक्षा मानके कायदा 2006 चे कलम 59, 26(2), (IV) प्रमाणे गुन्हा दाखल केला आहे. शहर पोलीस पुढील तपास करत आहेत.
