महाराष्ट्र संवाद न्यूज
संगमनेर – मंगळवारी (6 जून) काढण्यात येणाऱ्या सकल हिंदू समाज भगवा मोर्चाच्या पार्श्वभूमीवर प्रशासन सतर्क झाले असून ‘मोर्चा काढा मात्र सर्वतोपरी काळजी घ्या’, असे आवाहन करत मंगळवारच्या मोर्चाला प्रशासनाने काही अटींवर परवानगी दिली. तसेच स्वयंस्फूर्तीने शहर व तालुक्यातील बहुतांशी गावात बंद देखील पाळला जाणार आहे.
महाराष्ट्रात हिंदूंच्या सणांवर होणारे हल्ले, दिल्लीत साक्षीची जिहादींकडून चाकूने अनेक वार करून केलेली हत्या व जोर्वे गावातील ८ हिंदू तरुणांवर तलवारीने झालेल्या जीवघेण्या हल्ल्याच्या निषेधार्थ ६ जुन रोजी होणाऱ्या सकल हिंदु समाज ‘भगवा मोर्चा व संगमनेर शहर तालुका बंद”च्या पार्श्वभूमीवर पोलीस प्रशासनाने बोलवली बैठक होती. पोलीस उपाधीक्षक सोमनाथ वाघचौरे, तहसीलदार धीरज मांजरे, मुख्याधिकारी राहुल वाघ, पोलीस निरीक्षक भगवान मथुरे आदी अधिकारी उपस्थित होते.
मोर्चा संदर्भात पोलीस उपाधीक्षक वाघचौरे यांनी मोर्चाच्या आयोजकांना काही महत्त्वपूर्ण सूचना केल्या. मोठ्या संख्येने लोक मोर्चात सहभागी होणार असल्याने त्या अनुषंगाने काळजी घेण्याचे आवाहन त्यांनी केले. मोर्च्यामुळे कायदा सुव्यवस्था निर्माण होवू नये, असे नियोजन करण्याच्या सूचना उपविभागीय पोलीस अधिकारी सोमनाथ वाकचौरे यांनी यावेळी दिल्या.
मोर्चा व बंद संदर्भातील संयोजकांचे नियोजन बैठकीत समजावून घेण्यात आले. तालुक्यातील येणाऱ्या हजारो बंधू-भगिनींची येण्या-जाण्याची व्यवस्था, पार्किंग, पिण्याचे पाणी व नियोजनाची माहिती आयोजकांनी दिली.
मंगळवारी सकाळी ९ वाजता मोर्चा नगर परिषदेसमोरील लाल बहादूर शास्त्री चौकातून निघणार असून तो बाजारपेठ, तेलीखुंट, सय्यद बाबा चौक, मेनरोड, चावडी मार्गाने छत्रपती शिवाजी महाराज व डॉ. बाबासाहेब आंबेडकर यांना अभिवादन करून नवीन नगर रस्त्यावरील उपविभागीय पोलीस अधिकारी, प्रांताधिकारी कार्यालयासमोर येणार आहे. तेथे विश्व हिंदू परिषदेचे केंद्रीय सहमंत्री शंकरजी गायकर व कोल्हेवाडी गावचे जावई, सुदर्शन नॅशनल न्युजचे संपादक सुरेश चव्हाणके यांचे मार्गदर्शन होणार असल्याची माहिती आयोजकांनी दिली.
बैठकीस विशाल वाकचौरे, मयुर शेलार, योगेश सुर्यवंशी, कुलदीप ठाकुर, प्रशांत बेल्हेकर, सचिन कानकाटे, विजयकुमार पटाडे, सोमनाथ काळे, रमेश काळे, कैलास वाकचौरे, ज्ञानेश्वर थोरात, सुरेश कालडा, अश्विन बेल्हेकर, किशोर गुप्ता, दिपेश ताटकर आदींसह हिंदुत्ववादी कार्यकर्ते उपस्थित होते.
