महाराष्ट्र संवाद न्यूज
संगमनेर : खासदार संजय राऊत यांच्या वक्तव्याप्रकरणी शिवसेनेने (शिंदे गट) विना परवानगी केलेल्या आंदोलनाबद्दल आंदोलकांवर गुन्हा दाखल करण्याची मागणी शिवसेनेने (ठाकरे गट) केली आहे. या संदर्भात सोमवारी संगमनेर शहर पोलीस ठाण्याचे पोलीस निरीक्षक भगवानराव मथुरे यांना मागणीचे निवेदन देण्यात आले.
रविवारी शिवसेना शिंदे गट तालुकाप्रमुख रमेश काळे यांच्या नेतृत्वाखाली संगमनेर बस स्थानकासमोर आंदोलन करत राऊत यांच्या प्रतिमेला जोडे मारले होते. राऊत यांनी शिवसेनेविषयी (शिंदे गट) वाईट वक्तव्य केल्यास शिवसेना गप्प बसणार नसल्याचा इशारा यावेळी देण्यात आला.
यावरून स्थानिक शिवसेना (ठाकरे गट) आक्रमक झाला आहे. संगमनेर शहर पोलीस ठाण्याचे पोलीस निरीक्षक भगवान मथुरे यांची शिवसेनेचे (उद्धव बाळासाहेब ठाकरे) शहर प्रमुख अमर कतारी, तालुकाप्रमुख भाऊसाहेब हासे, संपर्कप्रमुख नरेश माळवे, युवा सेना तालुकाप्रमुख अक्षय गुंजाळ आदींच्या नेतृत्वाखाली पदाधिकारी, कार्यकर्त्यांनी भेट घेत शिवसेना (शिंदे गट) केलेले आंदोलन विनापरवाना असल्याचे सांगत संबंधितांवर कारवाईची मागणी केली.
शिवसेना पक्षाचे विद्यमान खासदार संजय राऊत यांच्या प्रतिमेला विना परवानगी जोडेमारो आंदोलन केले व त्यांच्या विरोधात चुकीच्या पद्धतीच्या घोषणा देऊन शिव्या देण्यात आल्या. शिवसेना (उद्धव बाळासाहेब ठाकरे) पक्षाचे खासदार संजय राऊत यांची बदनामी होईल या हेतूने गर्दी जमा करून कोणतीही परवानगी न घेता त्यांच्या विरोधात घोषणाबाजी केली म्हणून काही व्यक्तींवर गुन्हा दाखल करण्याची मागणी केली.
संजय राऊत नेहमी शिवसेना (ठाकरे) पक्षाची बाजू निर्भीडपणे मांडत असतात ते शिवसेनेचे मुख्य प्रवक्ते आहेत. त्यांच्या विरोधात अशा प्रकारचं आंदोलन करणाऱ्याला पक्षाचे पदाधिकारी धडा शिकवल्याशिवाय राहणार नाही, असे देखील म्हटले आहे.
सदर निवेदनावर शिवसेना (उद्धव बाळासाहेब ठाकरे) शहर प्रमुख अमरभाऊ कतारी, तालुकाप्रमुख भाऊसाहेब हासे, संपर्कप्रमुख नरेश माळवे, युवा सेना तालुकाप्रमुख अक्षय गुंजाळ, युवा सेना विधानसभा प्रमुख अमोल डुकरे, युवा सेनेचे फैसल सय्यद, सचिन साळवे, अनिल खुळे, सलमान शेख, शोएब शेख, तिलक गांधी, उपशहर प्रमुख इम्तियाज शेख, अजिज मोमीन, दीपक वन्नम, सचिव सुदर्शन इटप, पंचायत समिती सदस्य अशोक सातपुते, अशोक बडे, फरोज कतारी आदी शिवसैनिकांच्या सह्या आहेत.
शिवसेना ठाकरे पदाधिकारी कार्यकर्त्यांनी केलेल्या या मागणी संदर्भात पोलीस काय भूमिका घेतात याकडे लक्ष लागले आहे.
