महाराष्ट्र संवाद न्यूज
संगमनेर –भगवा मोर्चाच्या दिवशी तलवार घेऊन फिरणाऱ्यास नगरच्या गुन्हे अन्वेषण विभागाच्या पोलिसांनी पकडण्याचा प्रकार समोर आला होता. असाच आणखी एक प्रकार समोर आला आहे. शहर पोलीस ठाण्याच्या गस्तीवरील पथकाने तलवार घेऊन फिरणाऱ्यास आणखी एकाला ताब्यात घेतले असून तलवार बाळगणाऱ्या विरोधात भारतीय हत्यार कायदा 4/25 प्रमाणे गुन्हा दाखल करण्यात आला आहे.
रवींद्र राधाकिसन डेंगळे (वय 38 वर्ष, रा. निमगाव जाळी, ता. संगमनेर, जि. अहमदनगर) असे स्वतःच्या कब्जात धारदार तलवार बाळगणाऱ्या आरोपीचे नाव आहे. गेल्या आठवड्यात भगवा मोर्चाच्या दोन दिवस आधी ही घटना घडली. मोर्चाच्या पार्श्वभूमीवर कायदा सुव्यवस्थेचा प्रश्न निर्माण झालेला असल्याने शहर पोलिसांनी याबाबत मोठी गोपनीयता बाळगली होती. मात्र पोलीस ठाण्यात दाखल झालेल्या एफआयआर वरून हा प्रकार समोर आला आहे.
पोलीस निरीक्षक भगवान मथुरे यांच्या आदेशावरून शनिवारी रात्री संगमनेर शहर पोलीस ठाण्याचे सहाय्यक पोलीस निरीक्षक राजेंद्र पवार हे सहकारी पोलीस कर्मचाऱ्यांसह नवीन नगर रोड परिसरात पेट्रोलिंग करत होते. यादरम्यान पोलीस निरीक्षक मथुरे यांनी त्यांना मिळालेल्या माहितीच्या आधारे पवार यांना घटनास्थळी पाठविले होते. पोलीस पथक संगमनेर खुर्द शिवारातील शिबलापुर फाटा परिसरात गेले असता त्यांना एका काटवनाजवळ हातात तलवार घेऊन फिरणारा इसम आढळून आला.
पथकाने त्याला ताब्यात त्याचे नाव रवींद्र राधाकिसन डेंगळे असल्याचे निष्पन्न झाले पोलिसांनी डेंगळे यांच्या विरोधात शहर पोलीस ठाण्यात गुन्हा दाखल केला असून पुढील तपास पोलीस हेडकॉन्स्टेबल पारधी करत आहेत.
