महाराष्ट्र संवाद न्यूज
गेल्या काही वर्षात संगमनेर गांजा विक्रीचे प्रमुख केंद्र म्हणून समोर आले आहे. दोन दिवसांपूर्वी नगर-कल्याण हायवेवर ओतूर पोलिसांनी केलेल्या कारवाईत एका बोलेरो कारमधून गांजाची वाहतूक करताना संगमनेरातील दोघांना पकडले आहे. यातून गांजाचे पुन्हा एकदा संगमनेर कनेक्शन समोर आले.
सिद्धार्थ किशोर टेकाडे (वय ३१ वर्ष, रा. वाडेकर गल्ली, संगमनेर) आणि संतोष दत्तात्रय जऱ्हाड (वय ३७ वर्ष, रा. सहकार महर्षी भाऊसाहेब थोरात क्रीडा संकुलाजवळ, संगमनेर) अशी पोलिसांनी गांजासह पकडलेल्या दोघा आरोपींची नावे आहेत.
नगरच्या दिशेकडून कल्याणकडे एका पांढऱ्या रंगाच्या बोलेरो कारमधून गांजाची वाहतूक केली जात असल्याची माहिती ओतूर पोलिसांना समजली होती. आळेफाटा पास झाल्यानंतर संशयित बोलेरो कल्याणच्या दिशेने मार्गस्थ झाल्याची पक्की माहिती मिळताच पुणे ग्रामीण पोलीस अधीक्षक अंकित गोयल, अप्पर पोलीस अधीक्षक मितेश घट्टे, जुन्नरचे पोलीस उपाधीक्षक रवींद्र चौधर यांच्या मार्गदर्शनाखाली ओतूर पोलीस ठाण्याचे सहाय्यक पोलीस निरीक्षक सचिन कांडगे, उपनिरीक्षक आकाश शेळके यांच्यासह पोलीस कर्मचारी महेश पठारे, धनंजय पालवे, नरेंद्र गोराणे, देविदास खेडकर आदींनी संशयित बोलेरो पकडण्यासाठी सापळा रचला.
बोलेरो घेऊन दोघेजण कल्याणच्या दिशेने जात असताना नगर कल्याण हायवेवर कातकरे वस्तीजवळ बोलेरो आले असता पोलिसांनी तिला थांबण्याचा इशारा केला. बोलेरो थांबवत पोलिसांनी तिची तपासणी केली असता तिच्यामध्ये पोलिसांना गांजा आढळून आला. गांजाचे मोजमाप केले असता बारा किलो गांजा घेऊन जाणाऱ्या दोघांनाही पोलिसांनी ताब्यात घेत त्यांच्या विरोधात गुन्हा नोंदविला आहे. पुढील तपास पोलीस करत आहेत.
