महाराष्ट्र संवाद न्यूज
मुंबई – राष्ट्रवादी काँग्रेसचे अध्यक्ष शरद पवार यांना दिलेल्या धमकी प्रकरणी अटक केलेल्या सागर बर्वे याला मुंबईच्या महादंडाधिकारी न्यायालयाने एक दिवसाची पोलीस कोठडी सुनावली आहे.
आरोपी बर्वे यांच्याकडून हस्तगत केलेला लॅपटॉप आणि मोबाईल यातून मिळालेल्या माहितीच्या आधारे आरोपीची चौकशी करावयाची आहे. तसेच या प्रकरणात अन्य संशयित आरोपींचा सागर बर्वे यांच्याशी काही संबंध आहे का? याचा देखील तपास करावयाचा आहे.
आरोपीने आक्षपार्ह टिपणी करून दोन समूहात किंवा समाजात विविध समूहामध्ये कलह निर्माण केल्याच्या आरोपामुळे तपास होणे आवश्यक असल्याचे न्यायालयाला सांगत पोलिसांकडून दोन दिवसांची पोलीस कोठडी मागण्यात आली होती. मात्र न्यायालयाने एक दिवसाची पोलीस कोठडी दिली.
आरोपी सागर बर्वे यांच्यावतीने ॲड. सुशीला गुप्ता यांनी न्यायालयासमोर युक्तिवाद केला. युक्तिवाद करताना गुप्ता यांनी म्हटले की, सागर बर्वेने ज्या सोशल मीडियावरील प्रोफाइलवरून धमकी दिली, त्या सोशल मीडियावरील प्रोफाइल डिलीट केले आहे.
तसेच त्याच्या विरोधात दाखल गुन्ह्यातील कलम 504 व 506 हे जामीनपात्र आहेत. आत्तापर्यंतच्या पोलीस तपासात सागर बर्वेने सर्व माहिती दिली असून त्याचा मोबाईल आणि लॅपटॉप पोलिसांच्या ताब्यात आहे. त्यामुळे कोठडीची गरज काय असा प्रश्न उपस्थित करीत पोलीस कोठडीला विरोध दर्शविला.
