महाराष्ट्र संवाद न्यूज नेटवर्क
सेवानिवृत्त डीवायएसपी असलेल्या सासऱ्याने आपल्या मुलाच्या अपरोक्ष मुलीसमान असलेल्या सुनेवर लैंगिक अत्याचार करून सासरा-सुनेच्या नात्याला काळिमा फासल्याचा प्रकार समोर आला आहे. हा प्रकार पत्नीने पतीला सांगितल्यानंतर पतीनेही नराधम वडिलांची बाजू घेत पीडित पत्नीला मारहाण करून माहेरी हाकलून दिले.
याप्रकरणी सोलापूरच्या विजापूर नाका पोलीस ठाण्यात बापलेकाविरूध्द गुन्हा दाखल झाला आहे. सेवानिवृत्त डीवायएसपीच्या शिक्षक असलेल्या मुलाबरोबर पीडित तरूणीचा विवाह गेल्याच वर्षी झाला होता. विवाह झाल्यानंतर तिची महाविद्यालयीन शिक्षण घेण्याची इच्छा होती. त्यानुसार तिने महाविद्याविद्यालयात प्रवेश घेतला होता. 
पती शिक्षक असल्यामुळे त्यास दररोज शाळेत जावे लागायचे. त्यामुळे त्याने पत्नीला शिक्षणासाठी महाविद्यालयात नेण्या-आणण्याची जबाबदारी वडिलांवर सोपविली होती. त्यामुळे सासरा कधी मोटारीने तर कधी दुचाकीने सुनेला महाविद्यालयात नेणे आणि घरी आणत असे. यातूनच सास-याची सुनेवर वाईट नजर पडली. घरात अन्य कोणी नसताना तो सुनेला लज्जा वाटेल, असे कृत्य करू लागला.
त्यातूनच त्याने ऑगस्ट २०२२ मध्ये सुनेवर थेट लैंगिक अत्याचार केला. नंतर ही बाब कोणाला सांगितल्यास माहेरी हाकलून देण्याची धमकी देऊ लागला. त्यामुळे सुनेने संयम पाळला असताना त्याचा गैरफायदा घेत सास-याने पुन्हा-पुन्हा सुनेवर लैंगिक अत्याचार सुरू केले. शेवटी सहनशीलता संपल्यानंतर तिने ही आपबिती पतीच्या कानावर घातली.
उलट पतीने तिच्यावर खोटारडेपणाचा आळ घेत वडिलांची बदनामी करते, म्हणून पीडितेचा शारीरिक व मानसिक छळ सुरू केला. शेवटी तिला माहेरी हाकलून दिले. नंतर तिला नांदविण्यासाठी परत आणले नाही, असे फिर्यादीत म्हटले आहे. 
वरिष्ठ पोलीस निरीक्षक बाळकृष्ण हनपुडे-पाटील हे पुढील तपास करीत आहेत.
