महाराष्ट्र संवाद न्यूज
संगमनेर – आमदार बाळासाहेब थोरात यांच्या मार्गदर्शनाखाली संगमनेरचा विकास व शांतता काहींना पहावत नसल्याने जातीय तेढ निर्माण करून समाजात अशांतता निर्माण करणाऱ्या भाजपाच्या पदाधिकाऱ्यांनी आज जमावबंदीचा आदेश मोडून आ. बाळासाहेब थोरात यांच्या प्रतिमेची छेडछाड करण्याच्या निषेधार्थ संगमनेर तालुक्यात तीव्र संतापाची लाट उमटली असून या सर्व लोकांविरुद्ध तातडीने गुन्हे दाखल करावे, अशी मागणी संगमनेरकर व काँग्रेसच्यावतीने करण्यात आली आहे.
राज्यघटना व सर्वधर्मसमभाव हा विचार जोपासत पुरोगामी व वारकरी संप्रदायाचे पाईक असलेल्या आमदार थोरात यांनी संगमनेरमध्ये बंधुभाव व सामंजस्याचे वातावरण राहावे, यासाठी सातत्याने काम केले आहे. मात्र काही समाज विघातक शक्तींनी याला जातीयतेचे रूप देत स्वतःची राजकीय पोळी भाजण्याचा निंदनीय प्रकार केला आहे.
सकल हिंदू समाजाच्या नावावर अवघ्या तीस-पस्तीस खबऱ्यांचे काम करणाऱ्या लोकांनी आज स्टंटबाजीचे आंदोलन केले आणि यावेळी प्रसिद्धीसाठी सुसंस्कृत व संयमी नेते आमदार थोरात यांच्या फोटोची छेडछाड करून काळे लावण्याचा प्रयत्न केला. या घटनेची वार्ता समजताच तालुक्यात संतापाची लाट निर्माण झाली. गावागावातील कार्यकर्ते यशोधन कार्यालयात दाखल झाले. माजी आमदार डॉ. तांबे, डॉ. जयश्री थोरात, बाबासाहेब ओहोळ, विश्वास मुर्तडक काँग्रेसचे शहराध्यक्ष सोमेश्वर दिवटे यांच्यासह प्रमुख पदाधिकाऱ्यांनी सर्व कार्यकर्त्यांना संयम राखण्याचे आवाहन केले.
डॉ तांबे म्हणाले, सुसंस्कृत राजकारण हे आपल्या तालुक्याची परंपरा आहे. काही लोकांना हे पहावत नाही. विकास कामात कोणतेही योगदान न देणारे लोक जातीय तेढ निर्माण करू पाहत आहे. संगमनेरची शांतता व सुव्यवस्था बिघडवू पाहत आहेत. हे अगदी ठराविक लोक आहेत. अशा वाईट प्रवृत्तींचा तीव्र निषेध सर्वांनी केला पाहिजे. मात्र सर्वांनी संयम राखावा असे आवाहन केले.
पोलीस निरीक्षक भगवान मथुरे यांना या निवेदनाची प्रत बाबा ओहोळ, विश्वास मुर्तडक, सोमेश्वर दिवटे, निखिल पापडेजा, रामहरी कातोरे, अजय फटांगरे यांच्या उपस्थितीत देण्यात आली.
का केली कारवाईची मागणी…
सकल हिंदू समाजाचा आमदार बाळासाहेब थोरात यांनी अपमान केल्याचा आरोप करत संगमनेरमध्ये आमदार थोरात यांच्या निवासस्थानाजवळ जाणता राजा मैदान येथे भारतीय जनता पक्षाच्या कार्यकर्त्यांनी शुक्रवारी धरणे आंदोलन करीत थोरात यांचा निषेध करत घोषणाबाजी केली. यावेळी थोरात यांच्या प्रतिमेशी छेडछाड करत काळे फासण्याचा देखील प्रकार करण्यात आला.
