महाराष्ट्र संवाद न्यूज
संगमनेरमधील व्यावसायिकांची अतिक्रमणे चुकीच्या व अन्यायकारक पद्धतीने हटविली जात असून ही मोहीम थांबविण्याची मागणी शिवसेना (उद्धव बाळासाहेब ठाकरे) पक्षाच्यावतीने करण्यात आली आहे.
एका वादाच्या घटनेचा सूड म्हणून लघु व्यावसायिक, भाजीपाला, फळ विक्रेते, किरकोळ विक्रेते, टपरीधारक, स्टॉल धारक, धान्य विक्रेते, शेतकरी यांच्या विरोधात होत असलेल्या या अन्यायकारक मोहिमेबद्दल शिवसेना शहरप्रमुख अमर कतारी व पक्षाच्या पदाधिकाऱ्यांनी या संदर्भात गुरुवारी मुख्याधिकारी राहुल वाघ यांना निवेदन देत ही मागणी केली आहे.
या संदर्भात देण्यात आलेल्या निवेदनात म्हटले आहे की, पालिकेच्या अतिक्रमण मोहिमेमुळे या व्यावसायिकांचे व्यवसाय बंद पडले असून त्यांच्यावर उपासमारीची वेळ आली आहे. कोरोनामुळे दोन वर्षापेक्षा जास्त काळ सर्व व्यवसाय ठप्प झाले होते. त्यामुळे अनेक लोक कर्जबाजारी होऊन आत्महत्या करत आहे, अनेकांच्या नोकऱ्या गेल्या आहे, व्यवसायात तोटा झाला आहे, अशातच पालिकेकडून अतिक्रमण हटाव मोहीम राबविली जात असून यात सर्वसामान्य व्यावसायिकांचा भाजीपाला विक्रेत्यांचा व छोट्या-मोठ्या व्यावसायिकांचा विचार केलेला दिसत नाही.
संगमनेरमध्ये काही लोकांची भांडणे झाली याचा परिणाम संगमनेर शहरातील बाजारपेठेवर देखील झाला आहे. याचा सर्वाधिक फटका अतिक्रमण धारकांना बसला असून ज्या ठिकाणी वाद झाले त्या ठिकाणची अतिक्रमणे काढणे गरजेचे असल्याने आपण तशी कारवाईदेखील केली आहे. अतिक्रमणे हटविण्यास आमचा विरोध नसून या व्यावसायिकांचा कायमचा प्रश्न मार्गी लागावा यासाठी त्यांची काहीतरी व्यवस्था करून देणे आवश्यक आहे.
या संदर्भात पालिकेने नियमावली आखून देत त्याचे उल्लंघन करणाऱ्यांवर निश्चित कारवाई करावी. या अनुषंगाने येत्या चार दिवसात योग्य निर्णय झाला नाही तर संगमनेर तालुका शिवसेना युवा सेना महिला आघाडी व सर्व अंगीकृत संघटना टपरीधारक गाळेधारक फळभाजी विक्रेते छोटे स्टॉल वाले संगमनेर नगर परिषदेत ठिय्या आंदोलन, उपोषण करतील असाही इशारा अमर कतारी यांनी दिला आहे.
तालुकाप्रमुख भाऊसाहेब हासे, दीपक साळुंखे, सुदर्शन इटप आदींनी यावेळी सूचना केल्या. शिवसेनेच्या शिष्टमंडळात दिव्यांग सेनेचे जिल्हाप्रमुख जालिंदर लहामगे, कृषी उत्पन्न बाजार समितीचे सदस्य विजय सातपुते, उपशहर प्रमुख इम्तियाज शेख, वेणुगोपाल लाहोटी, दीपक वन्नम, मुस्लिम मावळा अजीज मोमीन, शिवसेना महिला आघाडी तालुकाप्रमुख शितल हासे, उपतालुकाप्रमुख वैशाली वडतल्ले, शहर प्रमुख संगीता गायकवाड, युवा सेनेचे अक्षय बिल्लाडे, अमोल डुकरे यांच्यासह किरकोळ व्यावसायिक आदी उपस्थित होते.
