महाराष्ट्र संवाद न्यूज
गेल्या आठ वर्षापासून गणेश कारखान्याची प्रगती थांबल्याने ऊस उत्पादकांचे हाल होत होते. गणेश साखर कारखाना हा राहाता तालुक्याची कामधेनू आहे. नुकत्याच झालेल्या निवडणुकीत सभासदांनी सभासदांनी दाखविलेल्या विश्वासाच्या बळावर हा कारखाना संगमनेर व संजीवनीप्रमाणे चालवून नवे संचालक मंडळ गणेशला पुन्हा गत वैभव प्राप्त करून देतील, असा विश्वास काँग्रेस नेते आमदार बाळासाहेब थोरात यांनी व्यक्त केला
गणेश कारखान्याच्या नूतन संचालक मंडळाचा सत्कार सहकार महर्षी भाऊसाहेब थोरात सहकारी साखर कारखान्याच्या अतिथी गृहावर करण्यात आला. यावेळी युवा नेते विवेकभैय्या कोल्हे, कारखान्याचे चेअरमन बाबा ओहोळ, कार्यकारी संचालक जगन्नाथ घुगरकर, डॉ. एकनाथ गोंदकर, गणेशचे संचालक ॲड .नारायणराव कारले, बाबासाहेब कारले, विजय दंडवते, गंगाधर डांगे, संपत हिंगे, महेंद्र गोरडे, बाळासाहेब शेळके, नानासाहेब नळे, सुधीर लहारे, विष्णुपंत शेळके, अनिल गाढवे, संपत चौधरी, अनिल टिळेकर, मधुकर सातव, आलेश कापसे, सुधाकर जाधव, शोभा गोंदकर, कमलताई धनवटे आदींसह पदाधिकारी उपस्थित होते.
थोरात म्हणाले, गणेश परिसरातील सभासदांनी निवडणुकीत गणेश परिवर्तन पॅनलवर मोठा विश्वास दाखवला. नवीन संचालक मंडळ हे जुन्या नव्यांचा मेळ असून कार्यक्षेत्रातील समस्यांची जाणीव असणारे आहे. उत्तम व्यवस्थापनाबरोबर सभासदांना चांगला भाव देणे व कारखान्याला पुन्हा वैभव प्राप्त करून देणे यासाठी सर्व संचालकांनी काम करावे.
राहाता तालुका हा पूर्वी वैभवशाली व समृद्ध तालुका होता. मात्र अनेक दिवसांपासून या तालुक्याची प्रगती थांबली आहे. शेतकऱ्यांचे अनेक प्रश्न आहेत. गणेश परिसरातील ऊस उत्पादक नेहमी संगमनेर व संजीवनीकडे ऊस द्यावा, यासाठी आग्रही असायचे. आता या उसाचे गणेश कारखान्यातच गाळप केले जाणार असून हा कारखाना पुन्हा आपला सुवर्णकाळ पाहिल असा विश्वासही व्यक्त केला
विवेक कोल्हे म्हणाले, आमदार बाळासाहेब थोरात हे राज्याच्या सहकारातील अत्यंत आदर्शवत व्यक्तिमत्व आहे. सहकार महर्षी शंकररावजी कोल्हे यांच्या विचारांवर गणेश कारखाना सक्षमपणे चालवला जाईल.
उपस्थित संचालकांनी मनोगत व्यक्त केले. आभार बाबा ओहोळ यांनी मानले.
