महाराष्ट्र संवाद न्यूज
अहमदनगर – शेवगाव येथील आडत व्यापारी व त्यांच्या भाऊजयीचा चोरीच्या उद्देशाने खून करणाऱ्या आरोपीला पकडण्यात अहमदनगरच्या स्थानिक गुन्हे शाखेला यश आले आहे. आरोपी सराईत गुन्हेगार असून त्याच्या नावावर छत्रपती संभाजीनगर जिल्ह्यामध्ये मोक्का, खुनासह दरोडा, खुनासह जबरी चोरी, चोरीच्या उद्देशाने खून करणे अशा स्वरूपाच्या सात गंभीर गुन्ह्याच्या नोंदी आहेत. खेडकर टाबर चव्हाण असे या आरोपीचे नाव आहे.
शुक्रवारी पहाटे चार वाजण्याच्या सुमारास शेवगावमधील मारवाड गल्लीतील आडत व्यापारी गोपीकिसन गंगाबिसन बलदवा यांच्यासह त्यांच्या भावजयी पुष्पा हरिकिसन बलदवा यांची हत्या करून 4 लाख 95 हजार रुपये किमतीचे दागिने व रोकड चोरुन नेण्यात आली होती. यासंदर्भात सुनिता गोपीकिसन बलदवा यांनी दिलेल्या फिर्यादीवरून शेवगाव पोलीस ठाण्यात भादवि कलम 302, 397, 307, 460 प्रमाणे खुनासह जबरी चोरीचा गुन्हा दाखल करण्यात आला होता.
घटनेचे गांभीर्य लक्षात घेत विशेष पोलीस महानिरीक्षक बी. जी. शेखर, पोलीस अधीक्षक राकेश ओला यांनी स्थानिक गुन्हे शाखेसह तपास पथके नेमली होती. स्थानिक गुन्हे शाखेचे पोलीस निरीक्षक दिनेश आहेर यांच्या नेतृत्वाखाली सहाय्यक पोलीस निरीक्षक गणेश वारुळे, हेमंत थोरात, पोलीस हेडकॉन्स्टेबल सुनील चव्हाण, दत्तात्रय हिगडे, अतुल लोटके, विजय विटेकर, दत्तात्रय गव्हाणे, बापूसाहेब फोलाने, देवेंद्र शेलार, रवींद्र कर्डिले, ज्ञानेश्वर शिंदे, संतोष लोंढे, जालिंदर माने, संदीप दरंदले, संदीप चव्हाण, फुरखान शेख, रवींद्र घुंगासे, अमृत आढाव, बाळासाहेब खेडकर, शिवाजी ढाकणे, किशोर शिरसाट, प्रशांत राठोड, संदीप पवार, उमाकांत गावडे, भरत बुधवंत, अरुण मोरे यांच्यासह शेवगाव पोलीस ठाण्यातील बाप्पा धाकतोडे यांची तीन वेगवेगळी पथके आरोपीचा शोध घेत होती.
सीसीटीव्हीच्या आधारे शोध घेणाऱ्या पोलीस पथकाला सीसीटीव्ही मधील संशयित आरोपी खेडकर चव्हाण हा बिडकीन ता. पैठण, जि. छत्रपती संभाजीनगर येथे त्याच्या गावी असल्याची माहिती मिळाली. पथकाने छत्रपती संभाजी नगरच्या सानिक गुन्हे शाखेच्या कर्मचाऱ्यांची मदत घेत बिडकीन गाठले. तेथे गावात फिरत असताना पथकाने त्याला शिताफिने ताब्यात घेतले. त्याने गुन्हा केल्याची कबुली दिल्याची माहिती स्थानिक गुन्हे शाखेच्यावतीने देण्यात आली आहे.
