महाराष्ट्र संवाद न्यूज
संगमनेर – जिवंत गोवंश जनावरांची कत्तल सुरू असल्याची माहिती मिळाल्याच्या कारणावरून संगमनेर शहर पोलीस ठाण्याच्या कर्मचाऱ्यांनी टाकलेल्या छाप्यात तब्बल 76 हजार रुपये किमतीचे गोमांस आढळून आले. याप्रकरणी पोलिसांनी कत्तलखाना चालक जावेद लियाकत शेख (वय 29 वर्षे रा. अलकानगर) याला अटक केली.
शहरातील मदिना नगरमध्ये गोवंश जनावरांची कत्तल केल्याची माहिती मिळतात पोलीस कॉन्स्टेबल विशाल कर्पे, विजय खाडे रोहिदास शिरसाठ व अजित कुर्हे यांनी घटनास्थळी जात छापा टाकला असता तेथे त्यांना मोठ्या प्रमाणात गोवंश जनावरांची कत्तल केल्याचे आढळून आले. पथकाने तेथे असलेले गोमांस ताब्यात घेत त्याची मोजणी केली. कारवाई मध्ये पथकाला 76 हजार रुपये किमतीचे 380 किलो गोमांस आढळून आले.
मदिना नगरमध्ये मोकळ्या मैदानालगत असलेल्या एका पत्र्याच्या शेडमध्ये हा कत्तलखाना राजरोसपणे सुरू असल्याचे पोलीस कारवाईतून समोर आले. पोलिसांनी या प्रकरणी जावेद लियाकत शेख याला अटक करून न्यायालयात हजर केले असता न्यायालयाने शेख याला चार दिवसांची पोलीस कोठडी सुनावली असल्याची माहिती संगमनेरचे पोलीस उपाधीक्षक सोमनाथ वाघचौरे यांनी दिली.
याप्रकरणी पोलीस कॉन्स्टेबल विशाल कर्पे यांनी दिलेल्या तक्रारीवरून आरोपी जावेद लियाकत शेख याच्या विरोधात संगमनेर शहर पोलीस ठाण्यात भारतीय दंड विधान संहिता कलम 269, 429 महाराष्ट्र पशु संरक्षण अधिनियम पाच (सी), नऊ (ए) नुसार गुन्हा दाखल करण्यात आला असून पुढील तपास शहर पोलीस ठाण्याचे पोलीस कर्मचारी अशोक पारधी करत आहेत.
दरम्यान गोवंश जनावरांच्या कत्तली संदर्भात, गोमांस वाहतुकी संदर्भात नागरिकांनी माहिती देण्याचे आवाहन पोलीस प्रशासनाने केले आहे.
