इंस्टाग्राम अँपवर जुळले होते सूत
बळजबरीने केलेल्या लग्नाला आरोपीच्या नातेवाईकांची होती उपस्थिती
महाराष्ट्र संवाद न्यूज
संगमनेर – अल्पवयीन शालेय मुलीला पळवून नेत संगमनेरातील कॅफे सेंटरमध्ये तिच्यावर बलात्कार केल्याचे प्रकरण ताजे असतानाच आता घारगावच्या पठार भागात एका महाविद्यालयीन तरुणीचे अपहरण करत पहिले लग्न झालेले असताना ते लपवून ठेवत तिच्याशी विवाह करून तिच्यावर लग्नाअगोदर आणि लग्नानंतरही बलात्कार केल्याचा प्रकार समोर आला आहे.
याप्रकरणी घारगाव पोलीस ठाण्यात पीडित युवतीने दिलेल्या तक्रारीवरून केशव बबन काळे याच्याविरोधात भारतीय दंड विधान कलम 363, 366, 376(2N) 506 प्रमाणे गुन्हा दाखल करण्यात आला आहे आरोपीला अद्याप अटक करण्यात आली नसल्याची माहिती मिळते. गेल्या तीन-चार दिवसातील ही दुसरी घटना आहे. त्यामुळे पठार भागात महिलांवरील अत्याचाराच्या घटनामध्ये वाढ झाल्याचे दिसते.
पठार भागातील अत्याचारित तरुणी संगमनेर मधील एका महाविद्यालयात प्रथम वर्ष कला शाखेचे शिक्षण घेत आहे. या युवतीची इंस्टाग्राम ॲपवर केशव काळे याच्याशी ओळख झाली होती. या ॲपच्या माध्यमातून त्यांच्यात चॅटींग होत असे. तसेच मोबाईलवर देखील संभाषण होत असे. 15 जुलैला पीडित तरुणी महाविद्यालयात येण्यासाठी गावातील चौकात उभी असताना तेथे आलेल्या आरोपी काळे याने तिला बळजबरीने आपल्या दुचाकीवरून पिंपळगाव देपा-शिरापूर मार्गे संगमनेर येथे आणले. त्यानंतर संगमनेरहून तिला अकोले- ओतुरमार्गे कबाडवाडी (ता. जुन्नर) येथे नेले.
15 आणि 16 जुलैला पीडित तरुणी आरोपीसोबत आरोपीच्या मामाच्या घरी थांबले होते. आरोपीने तू माझ्याशी लग्न केले नाही तर मी जीव देईल असे धमकावत या दोन दिवसात तिच्यावर तिच्या इच्छेविरुद्ध अत्याचार केला. त्यानंतर 17 जुलैला देखील सकाळी लग्नासाठी आली नाही तर मी जीव देईन अशाप्रकारे धमकावत जुन्नर येथून मोटरसायकलवर बसवून तिला आळंदी येथे नेले. तेथे अलंकापुरी विवाह संस्थेत तिच्याशी जबरदस्तीने लग्न केले. यावेळी आरोपीच्या आई-वडिलांसह अन्य नातेवाईक देखील उपस्थित होते. लग्न करतेवेळी आरोपीने तो अविवाहित असल्याचे तेथे लिहून दिले होते. लग्नाच्या रात्री देखील आरोपीने तिला मामाच्या घरी आणत तिच्यावर अत्याचार केले.
त्यानंतर दुसऱ्या दिवशी आरोपीने तिला त्याच्या घरी कुरकुंडी येथे आणले होते. तेथे तिला आरोपीचे लग्न झालेले असल्याचे समजले. त्यानंतर पीडित तरुणीने मोबाईलवरून आपल्या भावाशी संपर्क साधत झालेल्या प्रकाराची माहिती दिली. तरुणीच्या आई-वडिलांचा भावाने कुरकुंडी येथे जाऊन तिला घरी आणले त्यानंतर संबंधित युवतीने मंगळवारी घारगाव पोलीस ठाण्यात या संदर्भात तक्रार दिली. पुढील तपास पोलीस उपनिरीक्षक उमेश पतंगे करीत आहे.
