अविनाश बोधक, साईसुधा बच्चा–वनम, सविता हासे–घोलप आणि स्वप्नाली भुतडा–तापडे पहिल्या तीन क्रमांकात
महाराष्ट्र संवाद न्यूज
संगमनेर – संगमनेर महाविद्यालय सुरू असलेल्या पदव्युत्तर वृत्तपत्रविद्या पदविका अभ्यासक्रमाचा 2022-23 यावर्षीचा निकाल शंभर टक्के लागला आहे. यात अविनाश बोधक यांनी 73.28 टक्के गुण मिळवत प्रथम क्रमांक मिळविला. तर साईसुद्धा बच्चा–वनम व सविता हासे–घोलप यांनी 71.42 टक्के गुण मिळवत संयुक्तरित्या द्वितीय तर स्वप्नाली भुतडा–तापडे यांनी 70.14 टक्के गुण मिळवून तृतीय क्रमांक मिळवला आहे. अशी माहिती महाविद्यालयाचे अभ्यासक्रम समन्वयक प्रा. सुशांत सातपुते यांनी दिली.
बारा वर्षापासून सुरू आहे अभ्यासक्रम: शिक्षण प्रसारक संस्थेच्या संगमनेर महाविद्यालयात ज्येष्ठ पत्रकार, साहित्यिक डॉ. संतोष खेडलेकर यांच्या मार्गदर्शनाखाली गेल्या बारा वर्षापासून सावित्रीबाई फुले पुणे विद्यापीठाअंतर्गत पदव्युत्तर वृत्तपत्रविद्या पदविका अभ्यासक्रम सुरू आहे. विविध प्रात्यक्षिके, सराव सत्र व इतर अनेक वैशिष्ट्यांमुळे अहमदनगर बरोबरच नाशिक, पुणे, औरंगाबाद जिल्ह्यातून विद्यार्थी या अभ्यासक्रमासाठी संगमनेर महाविद्यालयात प्रवेश घेतात.
यांना आहे संधी : गृहिणी तसेच नोकरी करून पत्रकारिता किंवा लेखन कौशल्य शिकू इच्छिणाऱ्यांच्या सोयीसाठी प्रत्येक रविवारी सकाळी नऊ ते साडेबारा या वेळेत संगमनेर महाविद्यालयात पत्रकारिता अभ्यासक्रमाचे वर्ग चालविले जातात. मुद्रित माध्यमांबरोबरच दूरचित्रवाणी, नभोवाणी तसेच शासनाच्या विविध विभागात, विविध व्यावसायिक आस्थापनांमध्ये जनसंपर्क अधिकारी म्हणून नोकरीच्या संधी या अभ्यासक्रमाद्वारे उपलब्ध होऊ शकतात. पत्रकारितेबरोबरच मराठी भाषेचे विविध पैलू अधिक चांगल्या पद्धतीने शिकू इच्छिणाऱ्या शिक्षकांचाही या अभ्यासक्रमाला दरवर्षी उत्तम प्रतिसाद मिळतो.
यशस्वी विद्यार्थ्यांत यांचा आहे समावेश : अविनाश बोधक, साईसुद्धा बच्चा–वनम व सविता हासे–घोलप, स्वप्नाली भुतडा–तापडे या पहिल्या तीन यशस्वी विद्यार्थ्यांसोबत वृषाली सोनी–कासट व बाळू बिन्नर यांनी अनुक्रमे चौथा व पाचवा क्रमांक मिळवला. यावर्षीच्या अभ्यासक्रमात महिलांनी मोठ्या संख्येने यश मिळविले आहे.
नवीन प्रवेश सुरू: सन 2023-24 या शैक्षणिक वर्षाची प्रवेश प्रक्रिया सुरु झाली असून कोणत्याही शाखेचे पदवीधर या अभ्यासक्रमाला प्रवेश घेऊ शकतात. इच्छुकांनी प्रा. सुशांत सातपुते (9766760926) यांच्याशी संगमनेर महाविद्यालयाच्या कार्यालयीन वेळेत संपर्क साधावा, असे आवाहन महाविद्यालयाच्यावतीने करण्यात आले आहे.
यांनी केले अभिनंदन: उत्तीर्ण विद्यार्थ्यांचे शिक्षण प्रसारक संस्थेचे कार्याध्यक्ष डॉ. संजय मालपाणी, प्राचार्य डॉ. अरुण गायकवाड, अभ्यासक्रमाचे प्रमुख मार्गदर्शक प्रा. डॉ. संतोष खेडलेकर, अभ्यासक्रम समन्वयक प्रा. सुशांत सातपुते यांनी अभिनंदन केले आहे.
… पत्रकारिता अभ्यासक्रमात पहिल्या पाच क्रमांकात उत्तीर्ण झालेल्यांमध्ये चार शिक्षक व दोन गृहिणी आहेत. यातील प्रत्येकाचे महाविद्यालयीन शिक्षण पूर्ण होऊन 15 ते 30 वर्षे झाली आहेत. आमच्यातील कुणीही पत्रकारिता क्षेत्रात कार्यरत नाही, परंतु लेखन कौशल्य विकसित व्हावे, मराठी भाषेचे विविध पैलू अधिक बारकाईने समजावे व यातून सर्व प्रकारच्या अभिव्यक्तीचे कौशल्य अधिक विकसित व्हावे म्हणून आम्ही या अभ्यासक्रमाला प्रवेश घेतला होता. आमचा हा हेतू १०० टक्के सार्थ ठरला.
अविनाश बोधक (यशस्वी विद्यार्थी व जिल्हा परिषद शिक्षक)
