महाराष्ट्र संवाद न्यूज
अहमदनगर / नाशिक – राज्य पर्यटन विभागाच्यावतीने आयोजित करण्यात आलेल्या भंडारदरा वर्षा महोत्सवात परराज्यातील अनेक व्यावसायिकांनी उपस्थिती दर्शवत चांगला प्रतिसाद दिला. भंडारदरा आणि परिसराच्या निसर्ग सौंदर्याची भुरळ पडलेल्या या व्यावसायिकांनी या परिसरातील पर्यटनाला चालना देण्यासाठी निश्चितच प्रयत्न करण्याचे आश्वासन यावेळी दिले.
वर्षा महोत्सव: अहमदनगर जिल्ह्यातील अकोले तालुक्यातील भंडारदरा हे अतिशय निसर्ग संपन्न पर्यटन स्थळ आहे. या पर्यटन स्थळाची माहिती परराज्यातील पर्यटकांना व्हावी आणि तिथल्या सर्व लोककला आणि खाद्य संस्कृतीचा आनंद भारतभरातील पर्यटकांना घेता यावा, यासाठी राज्य सरकारच्या वतीने 12 ऑगस्टपासून वर्षा महोत्सवाचे आयोजन या ठिकाणी करण्यात आले आहे.
परराज्यातून आले पर्यटन व्यावसायिक; या महोत्सवाचा एक भाग म्हणून फॅम टूरचे आयोजन केले होते. यासाठी गुजरात, राजस्थान, कर्नाटक, तेलंगणा, दिल्ली, छत्तीसगड, पश्चिम बंगाल या परराज्यांमधून मोठ्या संख्येने पर्यटन व्यावसायिक उपस्थीत होते.
यांनी दिली माहिती: यावेळी परराज्यातील या व्यावसायिक पर्यटकांना भंडारदरा परिसराची माहिती, येथील जैव विविधता, इतिहास आणि भूगोल तसेच प्रस्तावित आणि सुरू असलेल्या साहस पर्यटनाची माहिती अभिजित अकोलकर यांनी दिली.
पर्यटकांसाठी सहलीचे आयोजन: येथील स्थळांची माहिती देणारी एक सहल दुसऱ्या दिवशी आखण्यात आली होती. न्हाणी, वसुंधरा, नेकलेस येथील धबधबे पाहून पर्यटकांना खुप आनंद झाला. तर अमृतेश्वर तेथील मंदिराला भेट दिल्यानंतर पर्यटकांनी या मंदिराच्या वास्तू कलेचा आनंद घेतला.
मनमुराद अनुभूती: महाराष्ट्रातील सुमारे १२ व्या शतकातील प्राचीन मंदिराविषयी माहिती दिली. मंदिराचे बांधकाम, देवदेवता, त्यातील नक्षीकाम याविषयी माहिती देण्यात आली. घाटघर धरणाच्या परिसरात फिरताना पर्यटकांनी जंगल, पावसाचा अनुभव, कडेकपारी, दरी, धुके या सगळ्यांची मनमुराद अनुभूती मिळवली.
यांनी केले मार्गदर्शन: यावेळी महाराष्ट्र पर्यटन विभागाचे सहसंचालक सुशील पवार यांनी देशभरातून आलेल्या पर्यटन व्यावसायिकांना मार्गदर्शन केले आणि शुभेच्छा दिल्या. कार्यक्रमाचे सह संयोजक संजय नाईक, श्वेता नाईक, संदीप मोरे, अभिजित अकोलकर यांचा सत्कार करण्यात आला. यावेळी महाराष्ट्र पर्यटन व्यावसायिकांचे प्रतिनिधी निरंजन कुलकर्णी आणि संगीता कळसकर उपस्थीत होते.
आदिवासी बांधवांचे पारंपारिक कलाकौशल्य, चित्रकला आणि नृत्याचा कार्यक्रम याला उपस्थितांनी आणि व्यावसायिक पर्यटकांनी मनापासून दाद दिली.
