महाराष्ट्र संवाद न्यूज @ अनंत पांगारकर
संगमनेर – राज्याचे माजी मुख्यमंत्री आणि शिवसेना पक्षप्रमुख उद्धव ठाकरे यांच्या शिर्डीच्या दौऱ्यामध्ये एका शेतकऱ्याच्या मुलानं उद्धव ठाकरेंना लोणचं-भाकरीची शिदोरी दिल्यानंतर उद्धव ठाकरेंनी भावनिक प्रतिक्रिया दिली. ते म्हणाले, हे प्रेम आहे त्यांच. हीच आमची शिदोरी आहे. हेच आमचे आशीर्वाद आहेत. मला बोलण्यासाठी शब्द नाहीत.
उद्धव ठाकरे शुक्रवारी संगमनेर, शिर्डी, कोपरगावच्या दुष्काळग्रस्त भागातील शेतकऱ्यांशी संवाद साधण्यासाठी आले होते. या दौरा दरम्यान त्यांनी दुष्काळी भागाची पाहणी करत शेतकऱ्यांच्या समस्या जाणून घेतल्या. शेतकऱ्यांनी देखील मोठ्या आपुलकी आणि आशेने आपल्या व्यथा ठाकरेंसमोर व्यक्त केल्या. यावेळी उद्धव ठाकरे यांनी शेतकऱ्यांना काळजी करू नका मी तुमच्यासोबत आहे, असा धीर दिला.
या दौऱ्यादरम्यान ठाकरे यांना एक सुखद आणि वेगळाच अनुभव आला. शेती पिकांची पाहणी करून ठाकरे दुष्काळग्रस्तांची संवाद साधत असताना त्यांच्याभोवती सुरक्षारक्षकांसह कार्यकर्ते, पदाधिकाऱ्यांची मोठी गर्दी होती. या गर्दी बाहेर एक चिमुकला मुलगा हातात काहीतरी घेऊन ठाकरे यांना खुणावत होता. गर्दीतून ठाकरे यांचे या मुलाकडे लक्ष गेल्यानंतर त्यांनी त्याला जवळ बोलावले. यावेळी या मुलाने ठाकरेंच्या हातात कापडात बांधलेली शिदोरी दिली. यात लोणचं भाकर व त्याचा असल्याचा या मुलांन त्यांना सांगत तुमच्यासाठी आणले असं सांगितलं. यावर ठाकरे यांनी या मुलाची आपुलकीने चौकशी करत ‘अरे बाळा, तू माझ्यासाठी शिदोरी आणलीस, पण तू काही खाल्लंस का? तू जेवलास का? की स्वतः न जेवता मला शिदोरी देतोयस?’ अशी विचारणा या मुलाला केली. यावर मुलांन आपण जेवल्याचे त्यांना सांगितले. त्यावर ठाकरे म्हणाले, ‘मी हे घेऊन जातो, मी खाईन हे, असं म्हणून त्यांनी ती शिदोरी आपल्याजवळ ठेवून घेतली.
बोलण्यासाठी शब्द नाहीत: यासंदर्भात माध्यमांशी बोलताना, प्रतिक्रिया देताना उद्धव ठाकरे म्हणाले की, हे प्रेम आहे त्यांच. हीच आमची शिदोरी आहे. हेच आमचे आशीर्वाद आहेत. मला बोलण्यासाठी शब्द नाहीत, असंही उद्धव ठाकरे म्हणाले.
