महाराष्ट्र संवाद न्यूज
संगमनेर – दूधगंगा नागरी सहकारी पतसंस्था 81 कोटी रुपयांच्या अपहार प्रकरणी फसवणुकीसह विविध कलमान्वये गुन्हा दाखल होऊन महिनाभराचा कालावधी उलटला आहे. मात्र मुख्य आरोपी भाऊसाहेब कुटे याच्यासह सर्वच आरोपी अद्यापही बाहेरच असल्याने या प्रकरणात राज्याचे महसूल मंत्री राधाकृष्ण विखे पाटील यांनी लक्ष घालण्याची मागणी ठेवीदारांनी केली आहे.
यांनी दिले निवेदन: महसूल तथा नगरचे पालकमंत्री राधाकृष्ण विखे पाटील बुधवारी संगमनेरमध्ये आले होते. यावेळी दूधगंगा खातेदार-ठेवीदार संघर्ष समितीच्यावतीने मोहन लांडगे, पोपट आगलावे, कैलास देशमुख, प्रभाकर रहाणे, सुनील सातपुते, मोरेश्वर जगताप, अनिल जोंधळे, चंद्रभान लांडगे, विकास सहाने, पुंजाहरी जोर्वेकर, शिवाजी कोल्हे, भारत सातपुते आदींनी त्यांची भेट घेत मागण्यांचे निवेदन दिले.
आरोपींना अटक नाही: दूधगंगा पतसंस्थेमध्ये ठेवी अडकल्याने अवस्था बिकट झाले आहे मुला मुलींचे शिक्षण लग्नकार्य कुटुंबातील आजारपण आदीसंदर्भात ठेवीदारांनी आपले गाऱ्हाणे महसूल मंत्र्यांकडे मांडले. अपहार प्रकरणी गुन्हा दाखल झाला, तपास अहमदनगर पोलिसांच्या आर्थिक गुन्हे शाखेकडे वर्ग झाला, तरी देखील अद्याप आरोपींना पकडण्यात आले नाही.
मागण्या: 2016 पूर्वीचे व 2021 नंतरचे ऑडिट करण्यात यावे. ठेवीदार व खातेदारांच्या रकमा सुरक्षित कराव्यात. आरोपी आणि कर्जदारांच्या मालमत्ता ताब्यात घ्या. घोटाळ्याचे स्वरूप मोठे असल्याने केंद्रीय तपास यंत्रणेमार्फत अथवा सीबीआय मार्फत तपास करा. सहकार खाते, महसूल खाते, पोलीस खाते, सरकारी वकील, न्यायव्यवस्था यांच्यात योग्य ताळमेळ व समन्वय असावा. विधानसभेत तारांकित किंवा लक्षवेधी प्रश्न उपस्थित करावा. सहकार व महसूल खात्याने आरोपी कर्जदार व जामीनदार यांच्या मालमत्ता जप्तीचा प्रस्ताव मंत्रालयात पाठवून अध्यादेश मिळवावा, आदी मागण्या महसूल मंत्र्यांना दिलेल्या निवेदनाद्वारे करण्यात आल्या आहे.
