दराडे कुटुंबावर काळाचा घाला, एकाच कुटुंबातील दोन कर्त्या पुरुषाचा मृत्यू
महाराष्ट्र संवाद न्यूज
आश्वी – संगमनेर तालुक्यातील पिंप्रीलौकी अझमपुर गावात नुकतीच मन हेलवणारी व मनाला सुन्न करणारी घटना घडली. १० दिवसापुर्वी येथील मितभाषी व जुन्या पिढीतील पदवीधर लक्ष्मण कारभारी दराडे यांचे ह्रदय विकाराच्या तीव्र झटक्याने खाजगी रुग्णालयात उपचारादरम्यान निधन झाले होते. गुरुवारी (२१ सप्टेंबर) त्यांच्या दशक्रिया विधीचा कार्यक्रम पार पडत असतांना काकस्पर्श होण्याआधीचं त्यांचा मोठा मुलगा दिलीप (वय ४०) याचादेखील ह्रदय विकाराने मृत्यू झाल्यामुळे पंचक्रोशीत शोककळा पसरली आहे.
दशक्रिया विधीतच घडली घटना: पिप्रींलौकी अजमपूर येथे दहा दिवसांपूर्वी लक्ष्मण कारभारी दराडे यांचे उपचारादरम्यान एका खाजगी रुग्णालयात निधन झाले होते. गुरुवारी त्यांच्या दशक्रियाविधीचा कार्यक्रम सुरु होता. त्यासाठी ग्रामस्थासह नातेवाईक व मित्रपरिवार मोठ्या संख्येने उपस्थित होता. याचवेळी पिंडाला कावळा शिवण्याचा विधी सुरु असताना हात जोडुन उभे असलेले दिलीप दराडे हे अचानक खाली कोसळले.
मंत्री विखेंच्या उपचारासाठी सूचना: त्यामुळे ग्रामस्थ व नातेवाईक यानी वेळ न दवडता दराडे यांना आश्वी येथील रुग्णालयात उपचारासाठी नेले. परंतू दराडे यांची परिस्थिती गंभीर असल्यामुळे त्याना पुढील उपचारासाठी प्रवरा रुग्णालयात पाठविण्यात आले. जनसेवा मंडळाचे अध्यक्ष भारतराव गिते यानी महसुलमंत्री राधाकृष्ण विखे पाटील यांना दुरध्वनीवरून या दुर्दैवी घटनेची माहीती दिल्यानंतर विखे पाटील यांनी प्रवरा रुग्णालयातील डॉक्टरांना उपचाराबाबत योग्य त्या सुचना दिल्या.
उपचारापूर्वीच मृत्यू: यावेळी रमेश गिते, संजय बिडवे, भाऊसाहेब गिते, मगन गिते, बाजीराव गिते, सूर्यभान गिते, नामदेव आव्हाड, भाऊसाहेब मुंढे, आनंदा दराडे, सतिष सोसे आदी रुग्णालयात धीर देण्यासाठी उपस्थित होते. मात्र तेथील डॉक्टरांनी दराडे यांनी मृत घोषित केले.
ह्रदय विकाराच्या तीव्र धक्याने वडिलापाठोपाठ मुलानेही जगाचा निरोप घेतल्याची बातमी वार्‍यासारखी आश्वीसह परिसरात पसरल्याने सर्वत्र शोककळा पसरली होती. दुपारी शोकाकुल वातावरणात दिलीप दराडे यांच्यावर अंत्यसंस्कार करण्यात आले. यावेळी मोठा जनसमुदाय उपस्थित होता. दरम्यान ७ वर्षापुर्वी दराडे कुटुंबातील मयत दिलीप दराडे यांचा लहान भाऊ अभियंता महेंद्र याचेदेखील सांगोला (पंढरपुर) येथे अपघाती निधन झाले होते. त्यापाठोपाठ गेल्या दहा दिवसात दराडे कुटुंबातील दोन कर्त्या पुरुषांचा मृत्यू झाला असल्याची माहिती सामाजिक कार्यकर्ते भारतराव गिते यांनी दिली आहे. तर दिवंगत दराडे यांच्या पश्चात आई, पत्नी, दोन लहान मुले असा परिवार आहे.
