महाराष्ट्र संवाद न्यूज
संगमनेरमध्ये गणेश विसर्जन मिरवणूक सुरू असताना हॅलोजन लावत असताना अचानकपणे वायरमनला विजेचा धक्का बसला आणि तो वायरला चिकटला. गर्दीमुळे हा प्रकार कोणाच्याच लक्षात आला नाही मात्र विसर्जन मिरवणूक पाहण्यासाठी थांबलेल्या सारिका दावणपल्लीच्या प्रसंगावधानामुळे या वायरमनचा जीव वाचला.
काय होती घटना: गुरुवारी संगमनेरमध्ये गणेश विसर्जन मिरवणुक चालु असताना नगरपालिकेसमोर एका दुकानाच्या दुसऱ्या मजल्यावर वायरमन हॅलोजन लावायचे काम करत असताना शॉक लागून तो वायरला चिटकला.
सारिकाच्या लक्षात आला प्रकार: मदत मिळण्यासाठी खुप प्रयत्न करीत होता पण मिरवणुकीच्या धाम-धुमीमुळे कोणाच्याच ते लक्षात आले नाही. मिरवणुक बघण्यासाठी महाराणा प्रताप महिला मंडळाच्या सदस्या सारिका दावनपल्ली नगरपालिकेजवळ आपल्या परिवाराबरोबर उभी होती. सारिकाचे लक्ष त्या वायरमनकडे गेले. तो वायरमन खुपच तडफड करीत होता. त्याला मदतीची गरज आहे हे सारिकाच्या लक्षात आले.
सारिकाने काय केले: सारिकाने क्षणाचाही विलंब न करता नगरपालिकेने गणेश मंडळाच्या स्वागतासाठी जे स्टेज उभारले होते तिथे पळत जाऊन तो वायरमन शॉक लागून चिटकला असल्याचे स्टेजवरील पालिकेच्या अधिकाऱ्यांच्या निदर्शनास आणून दिले. त्यामुळे तातडीने नगरपरिषदेच्या अधिकारी कर्मचाऱ्यांनी तेथे जात वायरमनचा जीव वाचविला.
सारिकाचा यांच्या हस्ते सत्कार: ऐन गणेश विसर्जन मिरवणुकीच्या धामधुमीत घडणारी मोठी दुर्घटना सारिका दावणपल्लीच्या प्रसंगावधानामुळे टळल्याने पालिका प्रशासनाच्या वतीने मुख्याधिकारी राहुल वाघ आणि तहसीलदार धीरज मांजरे यांच्या हस्ते सारिका दावणपल्लीचा सत्कार करण्यात आला.
