महाराष्ट्र संवाद न्यूज
संगमनेर – दि. ९ डिसेंबर
छत्रपती शिवाजी महाराजांचा अश्वारूढ पुतळा संगमनेर बसस्थानकावर बसविण्यात यावा, यासाठी नगरपालिकेने दिलेल्या प्रस्तावास मंजुरी द्यावी. महामानव डॉ. बाबासाहेब आंबेडकर यांचा पूर्णाकृती पुतळा उभारून त्याठिकाणी सुशोभीकरणासाठी, विश्वयुध्दात सहभागी असलेले व व्हिक्टोरिया क्रॉस प्राप्त शहीद नामदेवराव जाधव यांच्या स्मारकास प्रत्येकी १ कोटींचा निधी उपलब्ध करुन द्यावा, यासाठी आमदार सत्यजित तांबे यांनी मुख्यमंत्री एकनाथ शिंदे यांच्याकडे निवेदनाद्वारे मागणी केली. यासंदर्भात सकारात्मक कार्यवाहीचे आश्वासन मुख्यमंत्री एकनाथ शिंदे यांनी तांबे यांच्या नेतृत्वाखालील शिष्टमंडळाला दिले.
आमदार तांबे यांनी मुख्यमंत्र्यांकडे केलेल्या मागणीमुळे काँग्रेसचे पक्ष नेते आमदार बाळासाहेब थोरात यांच्या मार्गदर्शनाखाली छत्रपती शिवाजी महाराजांच्या अश्वारूढ पुतळ्यासह वैभवशाली स्मारके होण्याचा मार्ग सुकर होणार असून यामुळे संगमनेर शहराच्या वैभवात भर पडणार आहे.
नागपूर हिवाळी अधिवेशना दरम्यान आमदार सत्यजित तांबे यांनी या निधीची मागणी केली. यावेळी त्यांच्या समवेत युवक शहराध्यक्ष निखिल पापडेजा, माजी नगरसेवक शैलेश कलंत्री, मिलिंद औटी यांच्यासह विविध सहकारी उपस्थित होते.
संगमनेर शहरातील मध्यवर्ती असलेल्या हायटेक बस स्थानकासमोर छत्रपती शिवाजी महाराजांचा अश्वारूढ पुतळा व्हावा यासाठी आमदार बाळासाहेब थोरात यांच्या मार्गदर्शनाखाली संगमनेर नगरपालिकेने एसटी महामंडळाला जागा देण्यासाठी प्रस्ताव दिला असून ही जागा तात्काळ मिळावी.
महामानव भारतरत्न डॉ. बाबासाहेब आंबेडकर यांचा पूर्णकृती पुतळा उभारून त्या ठिकाणी सुशोभीकरणासाठी एक कोटींचा निधी उपलब्ध करून द्यावा.
याचबरोबर भारतीय स्वातंत्र्य लढ्यात योगदान दिलेल्या सर्व तालुक्यातील स्वातंत्र्यसैनिकांच्या स्मरणार्थ विश्व युद्धात सहभागी झालेले व्हिक्टोरिया क्रॉस प्राप्त शहीद नामदेवराव जाधव यांच्या स्मारकास एक कोटींचा निधी मिळावा अशी मागणी निवेदनात केली आहे.
छत्रपती शिवाजी महाराजांचा अश्वारूढ पुतळा, भारतरत्न डॉक्टर बाबासाहेब आंबेडकर यांचा पूर्णकृती पुतळा, फुले शाहू आंबेडकर स्मारक, संविधान प्रतिमा याचबरोबर शंभर फुटी तिरंगी झेंड्याची प्रतिकृती साकारणार आहे.
