महाराष्ट्र संवाद न्यूज
संगमनेर : नागरिकांना केंद्र शासनाच्या विविध योजनांची माहिती व लाभ देण्याच्या दृष्टिकोनातून वंचित राहिलेल्या घटकांना लाभ देण्यासाठी संगमनेर शहरात दिनांक २७ व २८ डिसेंबर रोजी विकसित भारत संकल्प यात्रेचे आयोजन करण्यात आले असल्याची माहिती नगरपरिषदेचे प्रशासक तथा मुख्याधिकारी राहुल वाघ यांनी दिली.
विकसित भारत संकल्प यात्रेअंतर्गत केंद्र सरकारच्या विविध योजनांसाठी पात्र असलेले परंतु लाभापासून वंचित असलेल्या घटकांपर्यंत केंद्र सरकारच्या विविध योजनांची माहिती देणे , जनजागृती करणे याबरोबरच लाभार्थ्यांशी संवाद करून या विकसित यात्रेत अंतर्गत लाभार्थ्यांची नोंदणी करण्यात येणार आहे.
शहरातील बस स्थानक परिसर येथे उद्या, दि. २७ रोजी दुपारी २.३० वाजता व २८ डिसेंबर रोजी सकाळी १० वाजता नगरपरिषद प्रांगणात या विकसित भारत संकल्प यात्रेचे आयोजन करण्यात आले असून शहरातील जास्तीत जास्त लाभार्थ्यांनी उपस्थित राहून केंद्र शासनाच्या विविध योजनांबाबत माहिती घेऊन सदर योजनेचा लाभ घेण्याचे आवाहन वाघ यांनी केले आहे.
——
काँग्रेसच्या भूमिकेकडे लक्ष
राज्यातल्या काही भागात या संकल्प यात्रेला नागरिकांनी विरोध केल्याची उदाहरणे आहेत. यात्रा घेऊन येणाऱ्या शासकीय कर्मचाऱ्यांना जनतेच्या रोषाचा सामना करावा लागला होता. या पार्श्वभूमीवर काँग्रेसचे वरिष्ठ नेते असलेले आमदार आमदार बाळासाहेब थोरात यांच्या संगमनेर शहरात या संकल्प यात्रेबाबत काँग्रेसचे कार्यकर्ते काय भूमिका घेतात, याकडे सर्वांचे लक्ष लागले आहे.
