महाराष्ट्र संवाद न्यूज
संगमनेर : काँग्रेसचे शिर्डी शहराध्यक्ष सचिन चौगुले आणि नगरसेवक सुरेश आरणे यांच्यावर राहाता तालुक्यातील लोणी येथे मंगळवारी संध्याकाळी प्राणघातक हल्ला करण्यात आला. दोघांनाही गंभीर जखमी अवस्थेत संगमनेरच्या खासगी रुग्णालयात उपचारासाठी दाखल करण्यात आले असून त्यांच्यावर उपचार सुरू आहे. दरम्यान माजी मंत्री आमदार बाळासाहेब थोरात यांनी रुग्णालयात जाऊन या दोघांची भेट घेतली.
मंगळवारी सायंकाळी राष्ट्रवादी काँग्रेसचे संस्थापक अध्यक्ष शरद पवार यांच्या उपस्थितीत महसूल मंत्री विखे यांच्या मतदारसंघातील आश्वीमध्ये आरपीआय नेते गायकवाड यांच्या अभिष्टचिंतन सोहळ्याचे आयोजन करण्यात आले होते. या कार्यक्रमासाठी हे दोघे उपस्थित होते. हा कार्यक्रम संपल्यानंतर शिर्डीकडे परतत असताना लोणी मध्ये चौगुले व आरणे यांची गाडी अडवत सात-आठ हल्लेखोरांनी त्यांच्यावर लोखंडी रॉडने मारहाण करत हल्ला चढविला.
हल्लेखोरांनी त्यांच्या वाहनाचे मोठ्या प्रमाणात नुकसान केले. हल्ल्यात गंभीर जखमी झालेल्या दोघांनाही तातडीने संगमनेर मधील खाजगी रुग्णालयात उपचारासाठी दाखल करण्यात आले. दरम्यान घटनेची माहिती मिळताच लोणी पोलिसांनी घटनास्थळी धाव घेतली. पोलिसांनी तपास सुरू केला असून वाहन ताब्यात घेतले आहे.
दरम्यान आल्याचे कारण स्पष्ट झाले नसले तरी हा हल्ला राजकीय वैमनस्त्यातून झाल्याचे बोलले जाते. या घटनेने परिसरात खळबळ उडाली असून अशाप्रकारे राजकीय पक्षाच्या पदाधिकारी आणि लोकप्रतिनिधीला भर रस्त्यात गाठून त्यांच्यावर हल्ला केला जात असल्याने या हल्ल्यामागील सूत्रधार आणि हल्लेखोर शोधण्याची मागणी होत आहे.
रुग्णालयात जखमींची भेट घेत आमदार बाळासाहेब थोरातांनी केली ही मागणी…
हल्ल्याची माहिती मिळताच काँग्रेस नेते आमदार बाळासाहेब थोरात यांनी रुग्णालयात जाऊन चौगुले व आरणे यांच्या प्रकृतीची वैद्यकीय अधिकाऱ्यांकडून माहिती घेतली. यावेळी रुग्णालयाबाहेर काँग्रेस कार्यकर्ते व नागरिकांनी मोठी गर्दी केली होती. दरम्यान हल्ल्याची घटना हे दहशतवादी कृत्य असून विरोधकांचा आवाज बंद करण्याचा हा प्रयत्न आहे. या प्रकरणाची चौकशी करून पोलिसांनी निपक्षपातीपणे कारवाई केली नाही तर तीव्र आंदोलन करण्याचा इशारा बाळासाहेब थोरात यांनी दिला आहे.
