महाराष्ट्र संवाद न्यूज
बिबट्याच्या हल्ल्यात दहा दिवसांपूर्वी नऊ वर्षाच्या बालकाचा मृत्यू झाल्याची घटना ताजी असतानाच गुरुवारी सायंकाळी पुन्हा एकदा बिबट्याच्या हल्ल्यात पाच वर्षीय बालकाचा मृत्यू झाल्याची घटना समोर आली आहे. दोन्ही घटना संगमनेर राहता तालुक्याच्या सीमेवर घडल्या.
हर्षल राहुल मोरे (रा. सादतपूर) असे बिबट्याच्या हल्ल्यात मृत झालेल्या दुर्दैवी बालकाचे नाव आहे. दहा दिवसांपूर्वी लोणी येथे प्रवरा रुग्णालयासमोरील भर लोकवस्तीत असलेल्या गोसावी वस्तीवर बिबट्याच्या हल्ल्यात अथर्व प्रवीण लहामगे या नववर्षीय बालकाचा मृत्यू झाला होता.
याच घटनेची पुनरावृत्ती गुरुवारी पुन्हा झाल्याचे दिसून आले. लोणीपासून जवळच असलेल्या सादतपूर येथे गुरुवारी सायंकाळी चार ते साडेचार वाजण्याच्या सुमारास गोरे वस्तीवर बिबट्याच्या हल्ल्यात गंभीर जखमी झालेल्या पाच वर्षीय हर्षल राहुल गोरे याचा मृत्यू झाल्याची घटना घडली.
घराकडे परतत असताना जवळच्या गिन्नी गवतामध्ये दबा धरून बसलेल्या बिबट्याने हर्षल वर झडप घालत त्याला गिन्नी गवतामध्ये ओढून नेले. ही घटना बघून त्याचा भाऊ वाघ-वाघ ओरडत घराकडे पळाला. त्यामुळे वस्तीवरील सर्व लोक गवताकडे एकच गलका करत पळत सुटले. त्यामुळे बिबट्याने तेथून धूम ठोकली.
जखमी अवस्थेतच हर्षल याला उपचारासाठी लोणीच्या प्रवरा ग्रामीण रुग्णालयात दाखल करण्यात आले, मात्र त्याचा मृत्यू झाल्याचे वैद्यकीय अधिकाऱ्यांनी सांगितले. गेल्या दहा दिवसाच्या अंतरात सलग घडलेल्या या दोन घटनांमुळे परिसरात घबराटीचे वातावरण निर्माण झाले आहे.
वनविभागाच्या अधिकाऱ्यांनी घटनास्थळी धाव घेऊन पंचनामा केला. धुमाकूळ घालणाऱ्या बिबट्याला पकडण्यासाठी या परिसरात वनविभागाने जवळपास पंधरा पिंजरे लावले आहेत. प्रवरानगर पाथरी रोडवरील थेटे वस्तीवर लावलेल्या पिंजऱ्यात एक बिबट्या अडकला हा अपवाद वगळता परिसरात बिबट्यांचा संचार सुरूच असल्याचे यातून दिसून आले.
