संगमनेर दि. ६
मविआ सरकारच्या काळातील रामेश्वर देवस्थानच्या निधीला महायुती सरकारने सत्तेवर येताच दिलेली स्थगिती उच्च न्यायालयाने उठविल्याने रामेश्वर देवस्थान सुशोभीकरण व सुधारणेचा मार्ग मोकळा झाला आहे.
त्यामुळे या कामाचे भूमिपूजन माजी आमदार डॉ. सुधीर तांबे, इंद्रजीत थोरात व डॉ. जयश्री थोरात यांच्या उपस्थितीत करण्यात आले. तत्कालीन महाविकास आघाडी सरकारमधील महसूल मंत्री बाळासाहेब थोरात यांच्या माध्यमातून संगमनेर तालुक्यातील प्रत्येक गावाच्या विविध विकास कामांसाठी मोठा निधी मिळाला. यात रामेश्वर देवस्थानच्या ६ कोटी रुपयांच्या निधीचा समावेश होता.
राज्यात सत्तांतर होताच महायुती सरकारने या निधीला स्थगिती दिल्याने देवस्थानच्या पदाधिकाऱ्यांना उच्च न्यायालयात धाव घ्यावी लागली होती. न्यायालयाने स्थगिती उठविल्यानंतर आधीच्या सहा कोटी रुपयांच्या निधीत आणखी एक कोटीचा निधी थोरात यांच्या माध्यमातून उपलब्ध करून देण्यात आला आहे. त्यानंतर या ७ कोटीच्या कामाला प्रारंभ करण्यात आला. यावेळी जिल्हा परिषदेचे माजी सदस्य रामहरी कातोरे, उद्योजक बाळासाहेब देशमाने, कारखान्याचे संचालक अनिल काळे, कृषी उत्पन्न बाजार समितीचे माजी सभापती अनिल देशमुख, सरपंच उज्वला देशमाने, उपसरपंच संकेत वनवे, सुनील देशमुख, विजय कोल्हे, दत्ता कासार, राजेंद्र देशमुख, रावसाहेब डेरे व विश्वस्त मंडळासह अनेक पदाधिकारी उपस्थित होते. जिल्हा परिषद सदस्य रामहरी कातोरे, बाळासाहेब देशमाने आदींसह विविध मान्यवरांनी मनोगत व्यक्त केले.
ही कामे होणार… या निधीमधून अकोले-संगमनेर मार्ग ते रामेश्वर देवस्थान रस्ता कॉंक्रिटीकरण, सभामंडप उभारणे, भोजनालयाचे विस्तारीकरण करणे, हॉल बांधकाम करणे, परिसरात पेव्हिंग ब्लॉक बसवणे, बाग बगीचा सुशोभीकरण आदी कामाचा समावेश आहे.
तांबे म्हणाले… काँग्रेस पक्षाचे नेते आमदार बाळासाहेब थोरात यांनी तालुक्यातील प्रत्येक वाडीवस्तीच्या विकासाकरता निधी मिळवला आहे. महाविकास आघाडी सरकारच्या काळामध्ये रामेश्वर देवस्थान परिसराच्या विकासासाठी त्यांनी पाच कोटी रुपयांचा निधी मिळवला होता. आता नव्याने पुन्हा एक कोटी रुपये निधी मिळवला असून या निधीमधून या परिसरात विविध विकास कामे होणार असल्याने हे तीर्थक्षेत्राबरोबर मोठे पर्यटन स्थळ म्हणून विकसित होईल.
डॉ. जयश्री थोरात म्हणाल्या… रामेश्वर हे या परिसराचे नव्हे तर तालुक्याचे श्रद्धास्थान आहे. या देवस्थानच्या विकासासाठी आमदार बाळासाहेब थोरात यांनी सातत्याने निधी मिळवला असून धांदरफळ परिसरात अनेक विकास कामे मार्गी लावली आहेत.
इंद्रजीत थोरात म्हणाले… आमदार थोरात यांच्या माध्यमातून सातत्याने तालुक्यात विकास कामे होत आहेत. मात्र काही लोक विनाकारण काम नसताना श्रेय घेण्याचा केविलवाना प्रयत्न करतात.
वर्क ऑर्डरला स्टे देऊन सत्ताधारी भाजपकडून देवाच्या कामातही राजकारण…
काँग्रेस पक्षाचे नेते आमदार बाळासाहेब थोरात यांनी महाविकास आघाडी सरकारच्या काळामध्ये रामेश्वर देवस्थान परिसराच्या विकासासाठी पाच कोटी रुपयांचा निधी मंजूर केला होता. ३१ जानेवारी २२ रोजी या कामाची प्रशासकीय मान्यता मिळाली होती. मात्र भाजप व पालकमंत्री यांच्या राजकारणातून या कामाच्या वर्क ऑर्डरला स्टे दिला गेला. कोर्टातून या कामाचा स्टे उठवला गेला असून पालकमंत्री व भाजपाने देवाच्या कामातही गलिच्छ राजकारण केले.
दत्ता कासार, रामेश्वर देवस्थानचे सचिव.
