कोल्हापूर, दि. ७ मार्च
मुख्यमंत्री एकनाथ शिंदे सोबत शिवसेनेतून (उद्धव बाळासाहेब ठाकरे) बाहेर पडताना गद्दारीचा शिक्का माथी बसलेल्या मुख्यमंत्री शिंदे गटातील काही खासदारांचा पत्ता भाजप कट करण्याच्या तयारीत आहे. त्यामुळे या खासदारांमध्ये अस्वस्थता निर्माण झाली असून काहीही करा, पण उमेदवारी द्या, धनुष्यबाण मिळणार नसेल तर कमळावर लढू! असं साकडं या खासदारांनी मुख्यमंत्री शिंदे यांना घातल आहे.
या मागणीसाठी खासदारांनी दबाव गट तयार केला अजून दोन दिवसात ते एकत्रित भेटणार असल्याचे वृत्त महाराष्ट्र टाइम्सने दिले आहे. शिवसेना फुटीवेळी मुख्यमंत्री शिंदे यांच्यासोबत शिवसेनेतील तेरा खासदार गेले होते. आगामी लोकसभा निवडणुकीत पुन्हा उमेदवारी आणि भरपूर निधी असा शब्द त्यावेळी गृहमंत्री अमित शहा यांनी दिल्याचे अनेक खासदार सांगतात. आता मात्र यापैकी अनेकांची उमेदवारी कापली जाणार असल्याचे संकेत मिळत असल्याने हे सर्व खासदार एकत्रित आले असून उमेदवारी मिळविण्यासाठी त्यांनी दबाव गट निर्माण केला आहे.
लोकसभा निवडणुकीच्या पार्श्वभूमीवर भारतीय जनता पक्षाने प्रत्येक मतदारसंघात अनेकदा सर्वेक्षण केले. यात बहुतांशी मतदारसंघात विद्यमान खासदारांविषयी नाराजी असल्याचे पुढे आले आहे. अनेक जण पराभूत होण्याचे संकेत मिळाल्याने त्या-त्या मतदारसंघात उमेदवार बदलाच्या भाजपाच्या हालचाली सुरू आहेत. शिंदे गटातील काही खासदार कमळाच्या चिन्हावर लढल्यास काय परिणाम होऊ शकतात याचा देखील अंदाज घेण्यात आला आहे. तेथेही फारसा समाधानकारक अहवाल मिळू शकला नसल्याने अनेकांची तिकिटे कापले जाण्याची शक्यता निर्माण झाली आहे. जिंकणाऱ्याला उमेदवारी असा निर्णय मुख्यमंत्र्यांचीही अडचण झाली असून धनुष्यबाण मिळणार नसेल तर कमळ चिन्हावर लढण्याची तयारी असून उमेदवारी द्यावी, असा आग्रह या खासदारांचा आहे.
यासाठी शिंदे गटाचे सर्वच आमदार एकत्रित आले असून त्यांनी दबाव गट निर्माण केल्याची माहिती समोर येत आहे.
