उमेदवारीवर एकमत होताच पूर्ण ताकदीनिशी पालकमंत्री विखेंना उभे राहावे लागेल नांदगावकरांच्या पाठीशी!
दि. १९ मार्च, मुंबई
लोकसभा निवडणुकीतील सर्वच पक्षांच्या उमेदवारांच्या जागा वाटपाची चर्चा अंतिम टप्प्यात असतानाच आता महायुतीला राज्यात नवा सहकारी मिळण्याची शक्यता निर्माण झाली. ‘पंतप्रधान नरेंद्र मोदी, गृहमंत्री अमित शहा यांची नावे राजकीय क्षितिजावरून कायमची हटवा’, असे सांगणारे महाराष्ट्र नवनिर्माण सेनेचे राज ठाकरे यांनी गृहमंत्री अमित शहा यांची मंगळवारी दिल्लीत भेट घेतली. या भेटीत मनसेला महायुतीत घेण्याचा निर्णय झाला असून यावर महायुतीमधील सर्व मित्र पक्षांचे एकमत झाले असल्याची माहिती समोर येत आहे.
सोमवारी रात्री राज ठाकरे अचानक दिल्लीला रवाना झाले होते. मंगळवारी त्यांनी केंद्रीय गृहमंत्री अमित शहा यांची भेट घेतली. या भेटीत ठाकरे यांनी नाशिक, दक्षिण मुंबई आणि शिर्डी या तीन पैकी किमान दोन लोकसभा मतदारसंघाची मागणी केल्याची माहिती वृत्तवाहिन्यांच्या बातम्यांमधून समोर येत आहे. यापैकी एक जागा मनसेला देण्यास भाजप अनुकूल असल्याची माहिती समोर येत आहे. अंतिम निर्णयानंतर मनसे शिर्डीची जागा लढविण्याची चिन्हे आहे. शिर्डीच्या जागेसाठी भाजपच्या मित्र पक्षांमध्ये एकमत होताना दिसत असून या मतदारसंघातून मनसेचे बाळा नांदगावकर संभाव्य उमेदवार असतील अशी माहिती समोर येत आहे.
आता लोकसभा निवडणुकीत राज ठाकरे यांचा लाव रे तो व्हिडिओचा अनुभव पाहता ठाकरेंच्या मनसेला महायुतीत घेण्यासाठी हालचाली सुरू होत्या. दरम्यानच्या काळात मनसेच्या नेत्यांनी उपमुख्यमंत्री देवेंद्र फडणवीस आणि मुख्यमंत्री एकनाथ शिंदे यांच्या भेटी देखील घेतल्या. आता थेट राज ठाकरेच दिल्लीत दाखल झाल्याने जागावाटपावर चर्चा झाल्याची माहिती मिळत आहे.
बाळा नांदगावकरांना शिर्डीतून उमेदवारी देण्यावर एकमत होण्याची शक्यता?
मनसेकडून दक्षिण मुंबई, नाशिक किंवा शिर्डी या तीन मतदार संघाची मागणी करण्यात येत असून यापैकी किमान दोन लोकसभा मतदारसंघावर शिक्कामोर्तब होऊ मनसेने मागणी केलेल्या तीनही जागा एकनाथ शिंदेंच्या शिवसेनेकडे आहेत. त्यापैकी एक जागा मनसेचे नेते बाळा नांदगावकरांना देण्याची भाजपने तयारी दर्शवली असल्याची माहिती मिळत आहे. मुख्यमंत्री एकनाथ शिंदेंची देखील यासाठी संमती असल्याची माहिती मिळत आहे. मात्र, राजकीय गणित पाहिल्यास दक्षिण मुंबईची जागा भाजपला हवी असून, शिंदेसेना नाशिकची जागा सोडण्याची शक्यता कमी आहे. त्यामुळे राखीव मतदारसंघ असलेल्या शिर्डीतून बाळा नांदगावकरांना उमेदवारी देण्यावर एकमत होण्याची शक्यता आहे.
नांदगावकरांसाठी पालकमंत्री विखेंना ताकदीनिशी उतरावे लागणार मैदानात…
दरम्यान शिर्डीतून नांदगावकर यांचे नाव निश्चित झाल्यास त्यांच्या विजयाची जबाबदारी जिल्ह्याचे पालकमंत्री राधाकृष्ण विखे पाटील यांच्यावर असेल. दुसरीकडे विखे यांचे सुपुत्र डॉ. सुजय विखे नगर दक्षिणमधून लोकसभा लढवत असले तरी विखे यांना सुजय विखेंसोबतच नांदगावकरांसाठी आपली सर्व शक्ती पणाला लावावी लागेल, असे दिसते. शिवसेना ठाकरे गटाचे संभाव्य उमेदवार असलेल्या माजी खासदार भाऊसाहेब वाकचौरे यांच्याबद्दल असलेल्या पक्षांतर्गत नाराजीचा, तसेच त्यांनी वेगवेगळ्या पक्षांवर त्यांनी लढविलेल्या निवडणुकांमुळे त्यांच्यावरील नाराजीचा फायदा देखील नांदगावकरांना मिळू शकतो. विद्यमान खासदार सदाशिव लोखंडे यांच्या विषयी असलेली नाराजी लक्षात घेता या मतदारसंघात नांदगावकरांची उमेदवारी प्रबळ ठरू शकते.
