बुधवार दि. २० मार्च, संगमनेर
साकुर येथील अल्पवयीन मुलीवर झालेल्या अत्याचार व तिच्या मृत्यूप्रकरणी पोलीस यंत्रणेने तातडीने तपास पूर्ण करत आरोपींना कठोर शिक्षा होईल यासाठी प्रयत्न करण्याची मागणी जयहिंद महिला मंच, एकविरा फाउंडेशनच्यावतीने तालुका काँग्रेसच्या अध्यक्ष डॉ. जयश्रीताई थोरात यांनी केली आहे.
थोरात यांनी महिला कार्यकर्त्यांसह पीडितेच्या कुटुंबीयांची भेट घेत त्यांचे सांत्वन केले. तसेच संगमनेरचे पोलीस उपाधीक्षक सोमनाथ वाघचौरे यांची भेट घेत या घटने संदर्भातील माहिती जाणून घेतली. यावेळी त्यांनी आरोपींवर कठोर कारवाई होण्यासाठी पोलीस प्रशासनाने सखोल तपास करण्याची मागणी केली.
साकुर येथे दहावीत शिकणाऱ्या अल्पवयीन मुलीवर झालेल्या अत्याचारानंतर तिने आत्महत्या केल्याचा प्रकार समोर आल्यानंतर सर्वत्र खळबळ उडाली. उशिराने या प्रकरणी पोलिसांनी गुन्हा दाखल केला असून काही आरोपींना अटक केली आहे. विधान परिषदेच्या उपसभापती डॉक्टर नीलम गोरे यांच्यासह राज्य महिला आयोग व विविध संस्थांनी याप्रकरणी दखल घेत कठोर कारवाईच्या सूचना पोलीस प्रशासनाला दिले आहे.
जयहिंद महिला मंच व एकविरा फाउंडेशनच्या माध्यमातून या घटनेचा तीव्र निषेध करण्यात आला असून आरोपींवर कडक कारवाई करण्याच्या मागणीचे निवेदन उपविभागीय पोलीस अधिकारी सोमनाथ वाकचौरे यांना देण्यात आले.
यावेळी कॅन्सर तज्ञ डॉ. जयश्रीताई थोरात, महिला आयोगाच्या सदस्य उत्कर्षा रुपवते, अर्चना बालोडे, निर्मला गुंजाळ, पद्मा थोरात, बेबी थोरात, सुनीता कांदळकर, सुरभी मोरे, तृष्णा औटी, तपस्या देशमुख आदींसह विविध महिला पदाधिकारी उपस्थित होत्या.
थोरात म्हणाल्या… झालेली घटना ही मानवतेला काळीमा फासणारी आहे. या घटनेचा काँग्रेस विधिमंडळ पक्ष नेते आमदार बाळासाहेब थोरात यांनीही तीव्र निषेध केला आहे. या घटनेतील सर्व आरोपींना तातडीने कडक शिक्षा झाली पाहिजे. त्यांना न्यायालयात जामीन मिळता कामा नये तसेच मुलीचे आई-वडील व कुटुंबीय भयग्रस्त झाले असून त्यांना सरकारकडून संरक्षण व मदत मिळाली पाहिजे.
एकविरा फाउंडेशन व जयहिंद महिला मंचच्यावतीने दिलेल्या निवेदनात म्हटले आहे की… साकुर येथे अल्पवयीन असलेल्या इयत्ता दहावीच्या मुलीवर झालेली अत्याचाराची घटना ही अत्यंत दुर्दैवी व निंदनीय आहे. या घटनेचा आम्ही तीव्र निषेध करत असून यातील आरोपींना कडक शिक्षा झाली पाहिजे. याचबरोबर या घटनेच्या चौकशीसाठी स्वतंत्र पोलीस महिला अधिकाऱ्याची नेमणूक करावी तसेच यातील सर्व आरोपींना लवकरात लवकर कडक शिक्षा झाली पाहिजे. याबरोबर या अल्पवयीन मुलीच्या कुटुंबीयांना शासनाकडून संरक्षण मिळावे व तसेच त्यांना मनोधैर्य योजनेअंतर्गत मदत मिळावी. या निवेदनावर शहराच्या माजी नगराध्यक्ष दुर्गाताई तांबे आणि एकविरा फाउंडेशनच्या अध्यक्ष डॉ. जयश्रीताई थोरात यांच्यासह जयहिंद महिला मंच आणि एकविरा फाउंडेशनच्या विविध महिला भगिनींच्या सह्या आहेत.
