बुधवार दि. २० मार्च, अहमदनगर
साकुर (ता. संगमनेर) येथील अल्पवयीन मुली सोबत घडलेल्या घटनेबाबत महाराष्ट्र राज्य महिला आयोगाने “सु-मोटो” दखल घेतली असून या संदर्भात संबंधितांवर कारवाईचे पोलीस प्रशासनाला निर्देश देत लवकरात लवकर यासंबंधीचा अहवाल सादर करण्याचे आदेश दिले दरम्यान राज्य महिला आयोगाच्या सदस्य उत्कर्षा रुपवतेंनी पीडितेच्या कुटुंबीयांची भेट घेत या प्रकरणीचा घटनाक्रम जाणून घेतला. यावेळी त्यांनी संबंधितांना तपासाच्या अनुषंगाने काही सूचना केल्या.
रुपवते यांनी बुधवारी संगमनेरच्या साकुर येथे जात पीडित मुलीच्या कुटुंबीयांची भेट घेतली. गेल्या महिन्यात २९ तारखेला घडलेल्या या घटनेची दखल पोलिसांनी दोन दिवसांपूर्वी घेतली होती. या संदर्भात पोलीस प्रशासनाकडून दिरंगाई होत असल्याचा आरोप पीडित मुलीच्या कुटुंबियांनी केला. रूपवते यांनी लगेचच या अनुषंगाने घारगाव पोलीस ठाण्याचे पोलीस निरीक्षक संतोष खेडकर यांना आरोपींना कठोर शासन होण्याचा दृष्टीने सूचना केल्या.
त्यानंतर रूपवते व संगमनेर काँग्रेसच्या तालुकाध्यक्ष डॉ. जयश्री थोरात यांनी महिला कार्यकर्त्या पदाधिकाऱ्यांसह संगमनेरमध्ये पोलीस उपाधीक्षक सोमनाथ वाघचौरे यांची भेट घेतली. तालुक्यात यापुढे अशा घटना घडणार नाही यासाठी पोलीस यंत्रणेने वेळेत सतर्कतेने गुन्हेगारांवर कारवाई करण्याच्या संदर्भात ठोस पावले उचलावे. पोलिसांची वाढीव गस्त, जलद कार्यवाही आदीसंदर्भात सूचना करण्यात आल्या असल्याचे रूपवते यांनी म्हटले आहे.
