शुक्रवार दि. २२ मार्च, अकोले
ध्येय गाठण्यासाठी आवश्यक असलेल्या जिद्दीच्या बळावर सामान्य कुटुंबातील एखादा तरुण अथवा तरुणीही यशाच्या सर्वोच्च शिखरावर पोहोचू शकते. घरात फारशी सुबत्ता नाही, रोज कमवायचे आणि खायचे अशा परिस्थितीत सामान्य कुटुंबात एखादा दिवा पेटला की त्याचा उजेड संपूर्ण कुटुंबासोबतच गावालाही जाणवतो. आणि गावासाठी ती अभिमानाची बाब ठरते, याचा वस्तुपाठ घालून देणारे उदाहरण संगमनेर नजीकच्या अकोले तालुक्यातील आदिवासी गाव असलेल्या कोतुळमध्ये समोर आले आहे.
घरात सदासर्वदा दारिद्र शेळके कुटुंबात आई विडी कामगार, पेंटर काम करताना फावल्या वेळात एखाद्या वृत्तपत्रासाठी बातमीदारी करणारे वडील अशोक शेळके आणि चार मुले यांच्या कुटुंबात परिस्थितीची जाणीव ठेवत आपल्या स्वप्नाला संतोष (शिवा) शेळके याने गवसणी घातली. नुकत्याच झालेल्या लोकसेवा आयोगाच्या परीक्षेत सहाय्यक विक्रीकर आयुक्त (असिस्टंट कमिशनर ऑफिसर स्टेट ऑफ महाराष्ट्र) या पदावर त्याची नियुक्ती झाली.
संतोष (शिवा) शेळके हा कोतुळ येथील कोतुळेश्वर विद्यालयात दहावीच्या केंद्र परीक्षेत केंद्रात पहिला, नासिक येथे मेकॅनिकल इंजीनियरिंगला पहिला, तर राज्य लोकसेवा आयोग परीक्षेतही क्लास वन, व टू अशा दोन परीक्षेत त्याने यश मिळवत सर्वांना आश्चर्याचा धक्का दिला. प्रथम लोकसेवा आयोगातील मंत्रालयीन सहायक कक्ष अधिकारी परीक्षा उत्तीर्ण होऊन त्या पदावर रुजू झाला. पाठोपाठ महाराष्ट्र राज्य सहाय्यक विक्रीकर आयुक्त या क्लासवन पदाची परीक्षा उत्तीर्ण झाला. त्याचा हा प्रवास सर्वांनाच आश्चर्यचकित करणारा ठरला आहे. सामान्य कुटुंबातील संतोषला यादरम्यान अनेक ग्रामस्थ, नातेवाईकांनी वेळोवेळी मदतीचा हात दिला. त्याच्या स्वप्नपूर्तीसाठी आई-वडिलांनी देखील अपार कष्ट केले.
यशाचे शिखर गाठताना शिवाने आपला अभ्यास सांभाळून आपल्या दोन बहिणींनाही योग्य मार्गदर्शन केल्याने त्यांचीदेखील आरोग्य विभागात पुणे व ठाणे येथे निवड झाली आहे. या आनंदात वाजत गाजत फुलांच्या वर्षावात हार, तुरे, फेटे बांधून गावाने त्याची आई-वडिलांसोबत मिरवणूक काढली. अन आई वडिलांच्या डोळ्यात आनंदाचे अश्रू तरळले.
एकाग्रतेने चांगला अभ्यास केला तर परिस्थितीवर मात करता येते. मग यश आपल्या पायाशी लोटांगण घेईल हे आजच्या युवा पिढीने ध्यानात घ्यावे. – संतोष (शिवा) शेळके.
