शुक्रवार दि. २२ मार्च, अहमदनगर
नगर दक्षिणमधून पुन्हा एकदा खासदार डॉ. सुजय विखे पाटील यांना लोकसभेची उमेदवारी जाहीर झाल्यानंतर पक्षातील अंतर्गत मतभेद सुरूच असल्याचे दिसते. भाजप नेत्या पंकजा मुंडे शुक्रवारी अहमदनगरच्या दौऱ्यावर आल्या असताना या दौऱ्यावेळी आमदार राम शिंदे यांची अनुपस्थिती समोर आली आहे. अद्यापही शिंदे नाराज असल्याचे बोलले जाते.
भाजपच्या बीडमधून उमेदवार असलेल्या माजी मंत्री पंकजा मुंडे नगर जिल्ह्यातील पाथर्डी तालुक्याच्या दौऱ्यावर होत्या. पाथर्डीत त्यांनी कार्यकर्त्यांशी संवाद साधला. यावेळी अहमदनगरचे उमेदवार खासदार डॉ. सुजय विखे पाटील, माजी आमदार शिवाजीराव कर्डिले, पाथर्डीच्या आमदार मोनिका राजळे आदी उपस्थित होते. या दौऱ्यात विधान परिषदेचे आमदार राम शिंदे यांची अनुपस्थिती प्रामुख्याने जाणवली.
खासदार विखे यांच्याबद्दल उमेदवारी मिळण्यापूर्वी आणि उमेदवारी मिळाल्यानंतर देखील मोठ्या प्रमाणात नाराजी असल्याचे दिसत आहे. आमदार शिंदे यांचे नाव देखील इच्छुक उमेदवारांच्या यादीत होते. शिंदे यांना उमेदवारी मिळेल असे त्यांना व त्यांच्या कार्यकर्त्यांना देखील आशा होती. मात्र विखे यांना उमेदवारी मिळाल्यानंतर विखेंबद्दल थेट बोलणे टाळले आहे. काहीजण जाहीरपणे तर काहीजण दबक्या आवाजात आपली नाराजी व्यक्त करताना दिसतात. त्यामुळे भाजपमध्ये आलबेल नसल्याचे दिसत आहे.
पालकमंत्री राधाकृष्ण विखे पाटील स्वतः नाराज असलेल्यांच्या भेटीगाठी घेऊन संवाद साधत आहे. दोन दिवसांपूर्वी आमदार शिंदे यांचे देखील त्यांनी भेट घेत चर्चा केली होती. या चर्चेचा तपशील दोघांनीही जाहीर केला नसला तरी ही भेट त्यांची नाराजी दूर करण्यासाठी असल्याचे बोलले जाते.
